PREPARASYON MAS PAHUGTAN SA GILAS TEAM
Paspasan ug mas pahugtan pa sa Gilas Pilipinas ang ilang pagpangandam sa nahabiling duha ka mga semana alang sa ilang kampanya sa 2019 FIBA Basketball World Cup nga sugdan karong Agusto 31 sa China.
Nagkanayon si national coach Yeng Guiao nga ang ilang matag adlaw nga praktis, shooting drills ug video watching usahon na sugod sunod semana.
Hinuon gipasabot ni Guiao nga dili kini nila mahimo sa matag adlaw gumikan kay kinahanglan sab nilang hatagan og gibug-aton ang ilang five-on-five drills.
Matod ni Guiao nga aron ilaha kining mahimo, kinahanglang modugang sila og oras sa matag adlaw nila nga gimbuhaton.
“That’s going to be every other day siguro. So we’ll add more hours next week,” matod ni Guiao sa interbyu sa Spin.ph.
Gilauman nga sa higayon nga magdugang na oras ang Gilas sa ilang ensayo, makaapil na’g balik sila si San Miguel Beermen center JuneMar Fajardo ug sila si Troy Rosario ug Roger Pogoy sa Talk N’ Text KaTropa.
Ang tulo ka nahisgutang mga magduduwa wala pa nakaapil sa preparasyon sa Gilas gumikan sa Philippine Basketball Association (PBA) Commissioner’s Cup finals series diin nagparang ilang mother teams.
Tungod sa PBA Commissioner’s Cup Finals, wala nakakuyog sila si Fajardo, Rosario ug Pogoy sa 10 ka mga adlaw nga training camp sa Gilas Pilipinas sa Spain nga nahuman ning bag-uhay lmag.
“We’re hoping by that time ready na rin yung tatlo na galing sa finals,” panghinaot ni Guiao.
Nanghinaot si Guiao nga dili maglisod sila si Fajardo, Pogoy, ug Rosario sa pag-adjust sa higayon nga mosubay na sab sila sa sestima sa Gilas gikan sa sestima sa ilang tagsatagsa ka team.
“I hope it’s a short period. I hope hindi sila masyadong matagalan doon sa adjustment nila,” batbat ni Guiao. “But we all know what they’re going through. It’s a difficult time, but at the same time, it’s an exciting time. We’re just hoping that with the short time maka-adjust sila agad, makapag-pahinga sila agad, at maka-recover agad sila from the finals.”
Mas mograbe pa ang kalisod sa preparasyon sa Gilas sa katapusang semana niini.
Gawas sa ilang matag adlaw nga pagpangandam, ang Gilas mosagubang pa og laing tuneup game batok sa mobisitang Adelaide 36ers nga sakop sa National Basketball League (NBL) sa Australia.
Ning kombatiha, matod ni Guiao nga ilaha nang magamit ang ilang nakat-unang leksyon sa sunodsunod nga tune-up games nga ilang gisagubang sa Spain.