Love at first sight
Angay ko na lang gyud angkunon nga nalove at first sight ko kang Ace kaniadto, sa unang higayon nga gikaila ko siya.
Kadlawon na kong nakatulog. Bisag kapoy ang akong lawas pagka buntag, mibangon gyud ko kay ting-eskuwela man. Hinuon, pagkahuman kog kaligo, medyo migaan na man ang paminaw ko sa akong kaugalingon.
Sa suki kong karenderya sa atbang sa gipuy-an kong boarding house namahaw. Wa pa gani ko makahumag kaon, miduol si Ace nako nga nagdala sa giorder niyang pagkaon ug softdrinks. Nakig-share siya sa akong table.
Nindot na sab nga smile ang iyang gipakita nako. Hilom kong nanghupaw. Hapit di ko makatan-aw og diretso kang Ace. Nia karon sa akong atubangan ang lalaki nga hilom kong gihigugma. Morag di na nuon ko komportable karon nga gikauban kog kaon si Ace.
Di parehas kaniadto nga wa ko pa angkona sa akong kaugalingon nga nahigugma ko niya.
“May gibati ka bang di maayo sa imong lawas, Jen? Morag wa ka man sa mood?”
“Kuan man gud, Ace, dugay kong nakatu’og gabii. Ambot ba, wa man ko mahimutang.”
Hapit ko na lang itug-an kang Ace nga maong dugay kong nakatuloig kagabii kay siya ang akong gihunahuna.
“Duna tingali naghunahuna nimo, Jen? Ingon man gyud kuno ani ang tawo, kon may naghuna-huna niya di siya mahimutang.”
“Kinsa kahay naghunahuna nako, no, Ace?”
Dugay kong gitan-aw ni Ace. Mikalit siyag seryuso.
“Mahibaw-an ra nimo, Jen, sa di madugay. Kuan man gud, na-love at first sight siya nimo.”
Wa ko makatingog. Nagtinan-away mig dugay si Ace. Mikalit lang pagkuba ang akong dughan.
“Tana, Jen, kay basig malate ta sa klase.”
Wa koy tingog nga misunod kang Ace nga mibiya sa karenderya. Sa sulod sa akong classroom, wa masulod sa akong ulo ang gitudlo sa among propesor. Di gyud mawala sa akong hunahuna si Ace. Morag wa ko sa akong kaugalingon niadtong tungora. Gihunahuna nako ang giingon ni Ace nga dunay naghunahuna nako maong wa ko mahimutang kagabii, nga ang maong tawo nahigugma nako, nga nag-love at first sight kini nako.
Kinsa kahang lalakiha? Ug nganong nakahibawo man sab si Ace nga ang maong lalaki na-love at first nako?
(TAPUSON SUNOD GULA)