P11M DRUGS NASAKMIT; ‘MIPUSIL’ SA PULIS, PATAY

NBI, PDEA NAKAKUHAG 1.5 KILONG SHABU; MIPUSIL SA PULIS SA BOGO NAPATAY

Dul-an sa P11 milyones nga balor sa kantidad sa gituohang shabu ang nasakmit sa tulo ka mga operasyon sa Philippine Drug Enforcement Agency (PDEA)-7 ug National Bureau of Investigation (NBI) 7 niadtong Biyernes sa gabii, Nobiyembre 8, 2019.

Samtang sa buy bust sa kapulisan sa Dakbayan sa Bogo, usa ka gikatahapang drug pusher nga giingong namusil sa pulis ilang napatay niadtong Biyernes sa hapon. Unang nadakpan sa buybust operation sa Barangay Calamba, Siyudad sa Sugbo ang usa ka 17 anyos nga lalake.

Matod tigpamaba sa PDEA7, Liea Alcantara, ang 17 anyos taga V.Rama st.

Nasakmit gikan sa menor ang gibana-banang 50 gramos nga shabu nga mokantidad og P340,000 base sa Dangerous Drugs Board (DDB) value.

Matod ni Alcantara nga taudtaud na nilang gimonitor ang menor nga tighatod ug tigbaligya sa illegal drugs.

Sa lain nga operasyon, nga gipangulohan sa NBI 7, ilang gipatuman ang usa ka search

warrant nga giisyu sa korte sa balay ni Maricor Zamora, alyas Maricris, sa Buhisan Road, Barangay Punta Princesa ning Dakbayan.

Ilang nasikop si Zamora, kinsa nakuhaan og 1.5 kilo sa gituohang shabu nga dunay DDB value nga P10.2 million.

“Mura gyud og asin nga gibutang pa sa tupperware samtang nag repack dihang nakuratan nga misulod na ang mga operatiba,” matod ni Alcantara

Dugang pa ni Alcantara nga ang NBI 7 ang nangulo sa raid.

Kaso nga kalapasan sa paghupot og ginadiling drugas ang atubangon ni Zamora.

Sa ilang follow-up operation, ilang nasikop si Wigner Duria, alyas Giner, taga Barangay Punta Princesa.

Nasakmit gikan kang Duria ang laing 50 gramos nga shabu nga mobalor og P340,000.

Sila si Zamora ug Duria anaa sa detention cell sa NBI 7. Pasakaan sila og kaso karong Lunes.

NAPATAY

Sa Dakbayan sa Bogo, gikatahapang drug pusher nga giingong nisukol sa mga pulis sa dakbayan nga nihimo og buybust, napatay niadtong Biyernes sa hapon sa Brgy. Marangog.

Si Joey Casas, 40, minyo, bag-ong nakagawas sa bilanggoan, namatay pipila ka minutos sa pag-abot sa tambalanan sa dakbayan.

Si Police Master Sgt. Joel Pino, sa Bogo Police nga nahinabi sa Superbalita Cebu, nagkanayon nga si Casas gipalitan og usa ka pakite sa shabu sa poseur buyer nga pulis balor og P500.

Apan human sa transaction, nakabantay si Casas nga pulis ang nipalit, nibunot kini sa iyang kalibre .45 nga pistola ug gipusil niya.

Maayo gani kay naka-bullet

proof vest ang pulis, wa madutli ug nakabawos kang Casas nga naigo sa tiyan.

Sa pag-abot sa tambalanan sa dakbayan sa Bogo, namatay si Casas.

Sa paghiling sa mga nurse sa bulsa sa shorts niini, nakuha ang duha ka medium nga putos sa shabu ug cash nga gituohang halin nga P2,490.

Nakuha sab sa kapulisan ang kalibre .45 nga pistola nga dunay bala sa magazine niini.

Ang drugas nga nakuha balor og P24,800.

Matod ni Pino nga si Casas bag-o lang nakagawas sa prisohan sa kaso sa drugas pinaagi sa plea bargaining.

TALISAY CITY

Duha ka mga menor de edad ug usa ka 25 anyos nga lalake nasikop sa kapulisan sa Siyudad sa Talisay sa usa ka balay suyopanan sa sitio Sawsawan, Barangay San Roque, Dakbayan sa Talisay, Biyernes sa gabii, Nobyembre 8.

Kini atol sa buy-bust batok sa usa ka giila sa kapulisan nga

high value target (HVT). Apan ang subject sa operasyon, matod ni Police major Gerard Ace Pelare, hepe sa Talisay City Police Station, nakaikyas.

Gipugngan una sa kapulisan ang ngalan sa target kay himuon pa ang laing operasyon.

Apan nasikop sa operatiba ang kauban niini nga si Clint McEnroe Cortel, 25, lumolupyo sa Barangay San Roque, kinsa anaa sa watchlist sa Talisay Police, ug ang laing duha ka 17-anyos nga mga lalake.

Ang duha ka mga menor de edad naaktuhan pa nga nag-pot session.