Langyaw gidakop; 2 ka mga menor ‘naluwas’ sa pulis

Usa ka British national nga giingong usa na ka tuig nga nakig-uban sa duha ka mga lalakeng menor, 6 ug 16 ang mga panuigon, sud sa iyang condominium unit, nasikop sa "rescue operation operation" sa kapulisan niadtong Biyernes sa gabii sa Barangay Hipodromo, Dakbayan sa Sugbo.

Ang mga menor nagpanuigon og 6 ug 16 anyos.

Ang suspek nangatarungan nga iyang gipatungha ang duha hinungdan nga iyang gikauban.

Si Police Lieutenant Erlinda Mayam, hepe sa Women and Children Protection Desk sa Cebu City Police Office, niila sa suspek nga si William Anthony Paul Becket, 61, kasamtangan nga nagpuyo sa condominium sa Barangay Hipodromo.

Matod pa ni Mayam nga nagpakabana nga mga non-government organization (NGO) ang nisumbong kanila.

Human nila makompirmar nga naa uban sa langyaw ang duha ka mga menor sud sa iyang condo unit, ila dayon nga gipahigayon ang operasyon uban sa mga sakop sa Women and Children Complaint and Action Center, Visayas Field Unit.

Giubanan usab sila sa mga representante sa Department of Social Welfare and Development (DSWD) ug Children’s Legal Bureau (CLB).

Dugang pa ni Mayam nga ilang nasakmit ang tulo ka mga laptop, tulo ka mga tablet, personal computer set ug tulo ka mga cellphone.

Nakakuha silag hulagway ni Becket nga kauban ang duha ka mga mag-agaw nga menor, P300, massage oil, passport, birth certificate ug suwat sa mga ginikanan nga nagtugot nga kuyog sila sa langyaw.

“Dili na pasabot nga dunay pagtugot sa ginikanan, wala nay tulobagon ang suspek,” sulti ni Mayam sa Superbalita Cebu.

Tungod niini, apilon sa pagimbestigar ang mga ginikanan sa mga menor nga taga Barangay Tipolo, Dakbayan sa Mandaue.

Si Becket mag-atubang og kaso nga kalapasan sa Akta Republika 9208 kun Anti-Trafficking in Persons Act of 2003 ug Akta Republika 10364 kun Expanded Anti-Trafficking in Persons Act of 2012.

Si Becket nga naa gitanggong sa CCPO detention cell nipasabot nga iyang gipatungha ang mga bata mao nga niadto sa iyang condo unit. /