Molampos kaha si Leni?
Abi ba nako og yaga-yaga lang tong pagtanyag ni Presidente Rodrigo Duterte ni Vice President Leni Robredo nga mangulo sa anti-illegal drug campaign sa kagamhanan. Tinud-anay man diay. Gidawat ug gihangop kini sa bise presidente. Daghan ang nakugang sa pagdawat ni Robredo dala ang pa-ingon nga iyang seryosohon ang iyang pagpangulo ug nga likayan nga adunay mga kinabuhi nga makalas.
Si Robredo mao ang mo-cochair sa Inter-agency Committee on Anti-illegal Drugs (ICAD) uban sa Director General sa Philippine Drug Enforcement Agency ( PDEA) Aaron Aquino. Kini pinasikad sa Executive Order No. 15 nga gipirmahan ni Pres. Duterte. Anaa gihapon sa ICAD ang function sa law enforcement, rehabilitation, justice ug advocacy. Ubos sa law enforcement, si Robredo maoy responsable sa pagpahigayon sa mga anti-illegal drug operations uban sa suporta sa ubang mga law enforcement agency sama sa Philippine National Police (PNP),PDEA ug National Anti-illegal Task Force.
Buot ipasabot nga dako kaayo ang papel nga pagahuptan sa bise presidente. Cabinet position kini. Kanang ubang function morag seremonyas o buwak-buwak sama sa rehabilitation. Alang lang kana sa mga drug addict aron makabalik sila sa katilingban. Ang advocacy program nagtumong sa educational campaign. Paggiya sa mga tawo, labi pa sa mga batan-on aron di mahitumpawak sa kaalautan.
Ari sa ta law enforcement nga para nako maoy pinaka-importante sa pagsumpo sa illegal nga drugas. Nasayod naman ta unsa ka lig-on aning sindikato nga maoy nagpaluyo sa pagpalusot ug pagpayuhot og illegal nga drugas. Mobangga man usab kini sila sa mga awtoridad gamit ang ilang gahum, kuwarta ug koneksiyon. Andam sila mopatay kon gikinahanglan.
Mi-ingon si Robredo nga basin makasalbar siya og kinabuhi kay supak siya sa extra judicial killings nga gihimo sa Duterte administration. Pangutana: wa man gani masumpo ang pagkuyanap sa illegal nga drugas nga pagpamatay na ang gihimo ni Duterte sukad sa iyang paglingkod, unsa na gyud kaha si Robredo nga adunay pusong mamon? Dili kaha mogara ang mga durugista nga hapo-hapohon lang sila ni Robredo? Katawan siya sa mga sindikato sa illegal nga drugas. Ingna kog bakakon.