This is the moment
Di gyud nako kalikayan nga mahunahuna si Ronnel bisan nag-estoryahay mi si Ranilo sa selpon. Unsaon man gud, morag gusto kong ikomparar ang duha ka lalaki. Mas nauna nga nagkaila mi si Ranilo kay hayiskol pa man ming nagkaklasmet, samtang si Ronnel karon lang nga college na ko.
Apan lisod kon bahin na sa love. Lisod ang pagklaro kon kinsa gyud ang lalaki nga para nako.
Milabay ang mga adlaw. Nagsigeg pamisita si Ronnel nako, samtang si Ranilo nagsige sab og tawag nako sa selpon. Wa na ko makasabot sa akong gibati. Morag gusto kong sugton si Ronnel, apan morag di ko kini ikapadayon kay mahunahuna ko si Ranilo. Kon buot sabton, di ko angay hunahunaon si Ranilo kon gusto gyud nakong sugton si Ronnel. Nganong maghunahuna man ko niya nga wa man siya mangulitawo nako?
Samtang si Ronnel agrisibo sa iyang love nako.
“Hangtod ba karon, Laila, wa pa gihapon ka makadesisyon? Dugay-dugay na man kong nangulitawo nimo?”
Sa tan-aw ko kang Ronnel morag kasurenderon na siya nako. Kay usa ka gabii nga iya kong gibisitahan, morag wa na man siyay kadasig. Naluoy ko niya. Apan ambot ba, wa pa man gyud nako maklaro sa akong kasingkasing kon love ko ba sab siya.
“Naa ra nimo, Ronnel, kon mohunong ka na bag pangulitawo nako. Di tika pugson. Unsaon man gud, until now wa pa gyud nako maseguro ang feeling ko nimo. Di man sab maayo nga sugton tika ug unya buwagan dayon kay wa diay koy love nimo, di ba?”
“Kuan man gud, Laila, kon love ko nimo, siyempre gisugot na unta ko nimo. Pero sa gidugayon sa akong pagpangulitawo nimo, sure ko nga wa gyud kay love nako.” Nakapanghupaw ko. “Ikaw ang modesisyon, Ronnel.”
Igo lang nanglingu-lingo si Ronnel. Mipauli siya nga morag nawad-an na gyud og gana nako. Apan gisabot ko lang siya kay tinuod man sab ang iyang giingon nga kon love ko pa siya gisugot na unta nako siya.
Nahunahuna nuon nako karon nga wa gyud koy gugma kang Ronnel.
Usa ka gabii nga gikan ko nga nangompra sa Mall para sa among kunsumo sa balay, nakugang ko kay diha sa among sala si Ranilo.