Kadtong gugmang gilimod ko
Giayran ko na ang iyang gugma kaniadto, apan wala niya ako kalimti sa iyang kinabuhi ug nagpabilin akong buhi sa iyang panumdoman.
Kapila na kahigayon nga motuyo siya pagduaw sa among panimalay. Magdala siyag mga pagkaon, mga bitamina ug mga tambal alang kanako. Gibati ko na ang tumang kaluoy kaniya. Di ko na siya buot pang makita sa akong kinabuhi.
“Tugoti lang gihapon ko nga makapadayag sa akong pagbati diha kanimo,” kahilakon si Jeffrey sa akong atubangan. “Ayaw itungina kanako ang imong gugma.”
Nagpanglingo ako ug kahilakon usab. ”Bisan may mga apan na ako, buta ang usa ka mata ko ug nahibat ang dagway ko, labi pang dili ako makadawat sa imong gugma ngari kanako. Dili na ako ang babaye nga angay kanimo. Sublion ko ba kini makadaghan aron makasabot ka?”
“Gikasubo ko, Marilyn, nga dili ako makasabot sa gipamulong mo. Ikaw ra ang akong gugma ug wala nay lain pa. Enhinyero na ako ug may mga patigayon ug industriya na. Makatabang ako kanimo, Makaalagad ako kanimo.”
Nagmagahi ako ug nangisog ang tingog ko. “Dili, Jeffrey, dili ako makatugot nga mahigugma ka gihapon kanako! Laksot na ako ug gibuboan og aksido ang nawong ko sa yawan-on kong bana. Maskin patay na ang akong bana tungod sa iyang pagkagumon sa
gidiling mga druga,
dili na ako mangita pag laing lalake. Igo na ang nahitabo kanako. Mabuhi gihapon ako sa pagpanindag ginagmay sa tiyanggihan sa atong lungsod. Biya na dinhi sa atong dapit ug padayon sa imong pagpanginabuhi sa halayong dakbayan. Kalimti ako.”
Midanguyngoy siya nga paghilak sa akong atubangan. Apan gilig-on ko ang akong baruganan. “I-ampo ko sa Diyos nga makakaplag ka og babaye nga angay sa imong kinabuhi. Bakol na ako ug nagsungkod na lang. Mag-antos ka sa pagsilbi kanako. Wala na akoy bili alang kanimo.”
Apan kalit siyang migakos ug mihalok kanako. Gitukmod ko siya ug nagmaisugon ang tingog ko. “Kalimit lagi ko kay wala ako mahigugma kanimo!”
Miduol ang ginikanan ko ug mga igsuon ko. Mibabag sila kang Jeffrey ug mipahilayo kini sa among panimalay.
Sa iyang pagpahilayo, sa iyang paglakaw sa kinatumyang dapit nga maabot sa akong panan-aw, midanguyngoy ako nga naghilak... kay may pagbati nang miturok sa akong dughan, apan dili na gyud kami angay sa usag-usa! (KATAPUSAN)