MISYON NGA NATUMAN

“Age is just a number” kon gugma na ang hisgutan.

Tinuod, kay kon gugma na ang moigo nimo, bisan og pila pa ang gintang sa edad sa kapikas sa imong kinabuhi, di kini mahimo nga babag sa paghigugmaay ninyong duha.

Sama kini sa sugilanon sa gugma sa bag-ong kinasal nga sila si Alfonso Flores ug Elena Besabella.

Halos katunga ang gintang sa ilang edad. Si Lolo Al kay 93 anyos samtang 51 anyos si Lola Elen.

Si Alzon Rey Ruelo, sakristan sa Santo Niño Parish sa Paknaan, siyudad sa Mandaue ug maoy nihatag og kasayuran sa Superbalita Cebu niadtong Nobiyembre 6 bahin sa talagsaon nga sugilanon sa gugma nila ni Lolo Al ug Lola Elen ug sa kasal nga nahitabo nga iya mismo nasaksihan.

Matod niya, sud na sa 11 ka tuig, nag-ipon ang duha nga pulos biyudo ug biyuda.

Apan usa ka adlaw niana, naabot sa panimalay sa mag

live-in partner ang duha ka madre sa ilang parokya. Misyon nila nga pakumpisalon ang mga parokyano nga mga edaran na.

Nahibaw-an ni Padre Michael “Mike” Hisoler, kura paroko sa parokya, nga nag-ipon sila si Lolo Al ug Lola Elen sud na sa taas nga katuigan.

Gusto ni Padre Mike nga makadawat og panalangin gikan sa kahitas-an ang kaminyuon sa duha hinungdan nga iya kining gikasal niadtong Nobiyembre 5 sa hapon sa ilang simbahan.

Sigon ni Ruelo nga usa sa mga misyon ni Padre Mike nga makasal ang mga nagpuyopuyo.

“Giingnan sila ni Father (Mike) nga magpakasal kay dako kaayo ang sala ang magipon if dili kasado,” asoy ni Ruelo ning mantalaan.

Nahitabo ang kasal ug libre kini nga gihimo sa parokya.

Sumala ni Ruelo nga ang simbahan ang nihatag og barong ug gown sa groom ug bride.

Ang simbahan usab ang nigasto sa salosalo human sa seremonyas sa kasal.

Gidugang ni Ruelo nga ubay-ubay na og nakasal nga gapuyopuyo si Padre Mike, apan sila si Lolo Al ug Lola Elen ang labing edaran.

“True love can last a lifetime. It doesn’t necessarily mean a perfect relationship but choosing to commit and stay through sickness and in health. This couple proves us that forever does exist and that love knows no age,”

pahayag ni Ruelo sa iyang post sa iyang Facebook account human masaksihi ang kasal nila ni Lolo Al ug Lola Elen.

/ TAMPO NGA HULAGWAY GIKAN NI ALZON REY RUELO ■ ADUNAY FOREVER: Naghawkanay sa ilang mga ngabil atubangan sa altar, ang bag-ong kinasal nga sila si Alfonso Flores ug Elena Besabella-Flores human sa seremonyas sa ilang kasal niadtong Nobiyembre 5 sa Santo Niño Parish sa Paknaan, dakbayan sa Mandaue. Halos katunga ang gintang sa edad ni Lolo Al ni Lola Elen, apan wa kini makapugong sa ilang gugma sa usag-usa.

Alzon Rey Ruelo