Top 4 tumong sa Road Warriors

Mga duwa karon 4:30 pm - NorthPort

batok Meralco 6:45 pm - NLEX

batok Magnolia

Seguradong luna sa Top 4 maoy tinguha sa NLEX Road Warriors sa ilang pagpakigbatok sa Magnolia Ang Pambansang Manok Hotshots sa main game karong gabii sa Philippine Basketball Association (PBA) Governor’s Cup sa Ynares Center sa Antipolo City.

Ang Road Warriors kasamtangang nag-una sa standing nga adunay 7-1 nga rekord apan nagkinahanglan pa silang makadaog og usa sa katapusan nilang tulo ka mga tahas aron makaangkon og luna sa Top 4.

Mahinungdanon ang pagsulod sa Top 4 gumikan kay aduna kini pakapin nga twice-to-beat nga bintaha sa quarter-finals.

Sa ilang bahin, ang Hotshots kasamtangang nagpatong sa ikaunom nga dapit dala ang 5-4 nga rekord.

Kuli na man tuod apan aduna pa gihapon poruhan ang Hotshots nga makailog og puwesto sa Top 4 kon modaog sila sa katapusan nilang duha ka mga tahas gikan karon.

Taas ang moral sa Hotshots gumikan kay gikan kini sa duha ka sunodsunod nga kadaugan batok sa Columbian Dyip ug Phoenix Fuel Masters.

Hinuon batok sa Road Warriors, seguradong malisod nga tahas ang sagubangon sa Hotshots.

Mas ninglig-on ang puwersa sa Road Warriors gumikan sa ilang impresibong import nga si Manny Harris unya naa pa gyud ang eksplosibong mga magduduwa nga sila si Kiefer Ravena, Jericho Cruz ug Philip Paniamogan.

Sa laing bahin, ang Meralco Bolts mosuway sab pagsikit sa pultahan sa Top 4 sa ilang pagpakigbatok sa NorthPort Batang Pier sa premirong duwa.

Ang Bolts kasamtangang nakigbahin sa TNT KaTropa sa ikaduhang luna dala ang 7-2 nga rekord samtang naa sa ikawalong dapit ang Batang Pier bitbit ang 3-5 nga baraha.