LAKERS DAOG NA SAB
Nagkumboya ang duha ka mga lider sa hosts Los Angeles Lakers nga sila si Anthony Davis ug LeBron James aron pakgangon ang rally sa Miami Heat ug iposte ang ilang ikapitong sunodsunod nga kadaugan, 95-80, sa National Basketball Association (NBA) kagahapon.
Gipahak sa Heat ang dobleng numero nga puntos nga labaw sa Lakers ngadto sa unom na lang ka mga puntos sa sayong bahin sa 4th quarter sa pagpangulo nila ni Jimmy Butler ug Goran Dragic.
Apan human niini, ningkayod og maayo sila si Davis ug James sa tanang departamento hilabi na sa depensa aron pabulhoton ang ilang opensa deretso paingon sa kadaugan.
“One thing about it — if your offense is behind your defense, you’re a really, really good team,” matod ni James. “And I’m OK with that right now.”
Gipangulohan ni Davis ang Lakers pinaagi sa iyang 26 puntos samtang nidugang og 25 puntos si James, 12 niini iyang gimugna sa 4th quarter.
Human sila nabunyagan og 102-112 nga kapildihan batok sa Los Angeles Clippers, ang Lakers impresibo na’g gipakita sa nagsunod nilang mga duwa.
“I had high expectations about what we could be,” matod ni Lakers coach Frank Vogel.
“We have a ton of defensive talent, (and) because the care factor has been high, it’s come together pretty quickly.”
Gumikan sa depensa sa Lakers, ilahang nalimitahan og 14 lang ka mga puntos ang Heat sa 4th quarter, tataw nga mao ang nagpadaog kanila.
“It’s our way,” asoy ni Davis. “We want to be a good defensive team.”
Ang Heat, nga natagak sa 6-3 nga rekord, gipangulohan ni Butler pinaagi sa iyang 22 puntos samtang nihatag og 19 puntos si Dragic.
“Even in the first half, we were playing this game in the mud,” batbat ni Miami coach Erik Spoelstra. “Obviously, we didn’t have all of us. We’re not making any excuses by any means. That’s a great team.”
Sa laing mga duwa, ningdaog ang Brooklyn Nets batok sa Portland TrailBlazers, 119115, Minnesota Timberwolves batok Golden State Warriors, 125-119 (OT), Utah Jazz batok Milwaukee Bucks, 103-100,
Denver Nuggets batok Philadelphia 76ers, 100-97, Toronto Raptors batok New Orleans Pelicans, 122-104, New York Knicks batok Dallas Mavericks, 106-102, Sacramento Kings batok Atlanta Hawks, 121-109, Indiana Pacers batok Detriot Pistons, 112-106, Orlando Magic batok Memphis Grizzlies, 118-86, ug Cleveland Cavaliers batok Washington Wizards, 113-100.