Mananagat natagak, nabiyaan sa bangka

Mananagat wa makatiwas sa iyang pagpangihi human natagak gikan sa iyang bangka samtang siya naglawig sa may kadagatan sa lungsod sa Minglanilla.

Swertre kay siya naluwas samtang nag-utaw-utaw sa kadagatan sa Brgy. Tulay sa mao nga lungsud. Apan ang iyang bangkang de motor wa pa makit-i kon diin kini gipadpad samtang naglawig nga nag-andar ang makina.

Si Dido Baayos, 34, minyo, mananagat, taga Sitio Kilawan,

Brgy. Tangke, dakbayan sa Talisay nagtuong katapusan na niya kadtong higayuna.

Si Police Master Sgt. Dante Vallente, sa Minglanilla Police station nga nahinabi sa Superbalita Cebu, nagkanayon nga sa Miyerkules sa buntag, Nobiyembre 27, usa ka sakop sa Bantay Dagat nga si Paterno Paragoso, 55, taga Brgy. Tungkop, maoy nipahibawo sa ilang buhatan kabahin sa iyang na-rescue nga mananagat alas 7 sa buntag.

Ang mananagat iyang nakitan nga nag-utaw-utaw sa kadagatan sa lawod sa Brgy. Tulay nga nagkupot lang sa bunga sa lubi nga gihimong buya.

Si Baayos nisaysay nga mga ala 1 sa kadlawon sa Miyerkules, nigikan siya sa Brgy. Tangke sakay sa iyang bangka nga de motor paingon sa dakbayan sa Carcar aron managat.

Apan tungod kay kaihi-on na kaayo siya, nangihi siya.

Samtang nangihi, aksidente siyang na-igo sa stepboard hinungdan nga natagak ug nahibilin sa dagat.Ang bangka padayong nidagan.

Samtang nagtimpasaw sa lawod, si Baayos nalipong apan nisampit siya sa Ginuo.

Nakakita siyag lubi nga nagutaw-utaw, maoy iyang gikapyutan.

“Pasalamat siya sa Ginuo kay kon wala pa tong bunga sa lubi nga iyang nahimong buya, hayan madisgrasya kini niadtong higayuna,” dugang ni Vallente.

Ang mamanagat nibutyag nga wa na siya makahibawo asa iyang bangka.

Matud pa ni Valllente nga swerte ang biktima kay naagi-an siya sa bantay dagat dayon gi-rescue ug gihatod sa Dakbayan sa Talisay.