Lapu mamintal sa mga daplin sa dan
Isip pagpangandam sa nagkaduol nga ika-500 tuig nga kasumaran sa Kadaugan sa Mactan sa Abril 27, 2021, usa ka halapad nga pagpamintal sa mga bugbong ug koral sa dakbayan pasiugdahan sa kagamhanan sa dakbayan sunod semana.
Katuyoan sa plano mao nga malimpyohan ang hugaw nga bungbong ug koral sa dakbayan nga napuno sa “vandal” kun paghugawhugaw.
Matod ni Lapu-Lapu City Mayor Junard “Ahong” Chan nga ang pagpamintal pangulohan sa iyang City Engineering Office ug Genral Services Office (GSO) uban ang volunteers.
Bugtong mga bungbong o koral nga anaa mahimutang sa circumferential road sa dakbayan ang pintalan.
Kon ugaling pribado, mananghid ang Dakbayan sa mga tag-iya nga mahimo ba usab kini nilang pintalan.
Dugang ni Chan nga di lang basta kay pintalan lang ang mga bongbong ug koral, butangan kini og nindot nga desinyo sama sa usa ka mural.
Mga maanindot nga talanawon sa dakbayan ug ikapasigarbong lugar sama sa Mactan beaches, shrine, gitara, lechon ug uban pa posibleng ibutang sa mga bungbong ug koral sa dakbayan.
Aron dili kaayo makagasto ang kagamhanan, suwayan pakigtambayayong ni Chan ang mga kompaniya sa pintal sa dakbayan nga moabaga sa mga pintal.
Plano ni Chan, masugdan ang pagpamintal sunod semana hilabi na nga nagkaduol na ang 500 ka adlaw nga countdown sa kalihukan sa 2021.
Ipahigayon kini sa Disyembre 14 diin dako ang posibilidad nga motambong si Presidente Rodrigo Duterte.
“Katong mga walls nga pwedi nato ma-promote ang Lapu-Lapu, mao to atoang pintalan. So, naa man tay mga local artist, naay mga maayong artist sa Lapu-Lapu, ato silang i-tap and also sa mga schools, katong mga maayo kaayo,” matod ni Chan.
Giklaro hinuon sa mayor nga di niya hulipan ang naandang color branding sa miaging administrasyon nga nabantog na sa dakbayan.
“Wala nagpasabot (nga atong hulipan ang color branding). Ang ato lang mga walls nga ma-promote ra gyud nato ang Lapu-Lapu and ubay-ubay ni nga mga wall ang ato pintalan,” pagpasabot ni Chan alang sa pagpangandam sa dakong kasaulogan sa 2021.