Panahon sa panaghiusa

Pila na lang ka adlaw sa dili pa ang opening ceremony sa 30th Southeast Asian (SEA) Games pero daw og sa pabilin gihapon kining gihamok sa kontrobersiya. Padayon ang pagkatap sa mga negatibong komento sa social media kalabot sa mga laing-laing reklamo nga nasinati ilabi na sa mga langyawng delegasyon.

Unang problema nga mibuto mao kadtong pagkatanggong sa mga football teams sa Timor Leste, Myanmar ug Cambodia sa airport tungod kay dugay nga nakuha service bus paingon sa ilang hotel.

Gikataho usab nga dili mao ang hotel nga gidad-an sa Timor-Leste football team ug ingon man ang mga hulagway sa mga atleta nga diha na lang sa sawog sa hotel nanghigda tungod kay wala pa kini pasudla sa ilang tagsatagsa ka mga rooms.

Misunod ang mga reklamo sa mga pagkaon nga gidalit, transportasyon, ang kahinay sa pag-distribute sa mga IDs/accreditation card ug ang padayon nga pag-construct sa pipila ka mga venues.

Ang maong kahiwi-an wa gihimakak sa Philippine Southeast Asian Games Organizing Committee (Phisgoc) kinsa dali gilayon nangayo og pasaylo, ug sa samang higayon, misaad nga dili na kini mahitabo pa.

Apan taliwala sa giluwatang pamahayag sa Phisgoc, way undang ang pagsaway ug ataki nga ilang nadawat pinaagi sa social media.

Dunay alegasyon nga posibiling gisakyan kini og pulitika. Hayan dunay mga pulitiko nga mipahimulos sa kahigayonan nga daw gustong moabiba sa kapakyasan sa nasod sa pag-host ning matag duha ka tuig nga kompetisyon.

Kon tinuod man gani ni, subo kini nga palandungon. Dili kini maoy panahon sa pamulitika. Panahon karon sa paghiusa tungod ug alang sa kalampusan ning pagpahigayon sa usa ka dakong event kay kini garbo kanatong tanang Pilipinhon.

Ang kalampusan sa usa, kalampusan kanatong tanan.