Tigre nga ex

Dear Noy Kulas,

Just call me Maria, 29 anyos na. Ang akong problema parte sa ex sa akong boyfriend nga magsige og post sa FB nga klaro kaayong pasaring nako.

Dihang nagkaila ug nagkaamigo mi sa akong boyfriend, wa nay klaro ang ilang relasyon kay magsige og selos ang babaye. Bisan kinsa ra ang awayon aning bayhana kay bastos kaayo og baba. In short, eskandalosa. Klaro kaayo nga sa wa pa ko moabot sa life sa akong boyfriend, wa na silay klaro pero ako na ang gibasol niya kay tungod kuno nako, nagkabuwag sila.

Kinsa ba ang ganahan makiguban aning bayhana nga bisan cousins sa akong BF iyang awayon dihang uyab pa sila. Pirme siya dudahan nga dunay lain. In short, di na healthy ang ilang relationship sa wa pa mi sa akong boyfriend.

Mag chat siya nako og bisan unsa na lang ang iyang tawag nako. Akong gi-block but magsige man og post nga klaro kaayo ako ang giigo. Bisan ang akong parents affected na sa ka bastos aning bayhana. Ako ba kaha siyang makiha sa iyang gibuhat? Nag send ko aning akong problem kay nakabasa ko sa inyong balita. I need your advice.

MARIA

Maria,

Maorag ikaduha na tingali kang gasuwat nako ning buwana parte sa susamang problema. Kon nangaway na nimo sa iyang post sa social media unya klaro kaayong ikaw ang iyang gipasabot, mahimo na siyang ikiha. Basta maka prove ka 100 percent nga ikaw ang iyang gipasabot sa iyang posts, makiha nimo siya.

Lain nga mabasehan nimo mao ang inyong mga chat diin ikaw iyang gibastos. Basta ang iyang chat nagdaut kanimo ug nagbinastos, mahimo kaayo nimo ning ebidensya sa imong kiha batok kaniya. Basta ang tanan imong gi screenshot aron gamitong ebidensya.

Ayaw lang mo pagpadala sa iyang gipanulti. Ayaw pag stoop down ngadto sa iyang level kay nakahibawo na man mo sa iyang nature. Kon imo siyang patulan, unsa na man unyay inyong kalainang duha. Gibiyaan gani siya sa imong boyfriend tungod kay di maayo ang iyang taras. Let her heart bleed sa iyang kasuya ninyo. Ayaw siya hatagi og panahon kay malipay siya kon madutlan ka sa iyang gipanulti.Instead, iampo na siya nga mag-usab. Panghinaut na lang.