Your love, your trust

Nakalitan gyud ko dihang gikuhit ang akong bukton. Naglakaw ko sa sidewalk sa Colon ug mipaingon sa huwatanan kog sakyanan para sa akong pagpauli. Gikan pa ko sa eskuwelahan. Nakalingi gyud ko ug gikusmoran ko ang lalaki nga diha sa akong luyo ug maoy nagkuhit nako.

Nag-smile ang lalaki nako. Nadiyong ang akong mga mata ug kalit kong nahapak sa bukton ang lalaki.

“Ikaw man diay, Andrie! Hapit wa ko makaila nimo, uy!”

Nakig-aper si Andrei nako. Unya nagkinataw-anay mi. Di gyud tuod mailhan dayon si

Andrei. Dako ang kausaban sa iyang hitsura. Almost four years na ang uwahi namong panagkita, during sa among paggradwar sa haysikol.

Ug karon third year college na mi.

Kaniadto daot, ug kalkag ang buhok ni Andrei apan karon macho na siya ug guwapo. Husto siya sa height.

“Sus,. Hasta sab ka, Mercy. Hapit wa sab ko makaila nimo. Kaniadto morag way sudlay ang imong buhok, nagpabayayat ka lag pamiste. Tambok pa gyud. Pero karon, wow! Guwapa na gyud ug seksi pa.”

“Saba diha!” Nahapak kog usab ang bukton ni Andrei apan sa hilom nalipay ko sa iyang pagdayeg nako.

“Ikaw sab, Andrei. dako nag kausaban. Guwapo na kaayo ka.”

“Salamat. Sayo pa man, anha sa ta diha.”

Gitan-aw ko ang gitudlo ni Andrei. Usa ka snack bar. Gitan-aw ko ang akong wrist watch. Five in the afternoon. Misugot ko kay sayo pa man.

Ug samtang nag-esnak mi si Andrei, nagsige siyag tan-aw nako. Na, di na nuon ko komportable sa among sitwasyon.

“Ikaw, ha, Andrei. Ayaw gani kog tan-awa og ingon ana. Mahilis man sab ta anang imong tinan-awan.”

Igo lang mipakibo sa iyang mga abaga si Andrei. Unya mismile na sab siya nako. Sukad ganina nagsige lag pahiyom si Andrei nako. Aw, mipahiyom na lang sab ko.

“Kining, Mercy, musta ang imong lovelife? Maybe nakita mo na ang imong prince charming. Ingon ra ba ka nako kaniadto nga manguyab ka lang kon ang imong prince charming ang imong mahimong boyfriend.”

Nakapangawot ko sa akong ulo. “Well, mao tingali, Andrei. Siya tingali ang akong prince charming kay gisugot ko man siya.”

Unya nahunahuna ko si Bobby nga akong boyfriend.

(SUMPAYAN)