LET’S UNITE: PACQUIAO
Imbis maglalis, giawhag ni Senador Manny Pacquiao ang tanan nga maghiusa ug suportahan ang mga atletang Pinoy sa 30th Southeast Asian Games nga pormal ablihan karong Sabado sa Philippine Arena sa Bulacan.
“Ang panawagan ko po sa ating mga kababayan, magkaisa po tayo, suportahan natin ang mga atleta natin kasi ito ang mukha natin, ito ang karangalan nating lahat,” padayag ni Pacquiao sa interview didto sa Senado.
Ang Pilipinas mo-host sa matag duha ka tuig nga kompetisyon gikan sa Nobiyembre 30 ngadto na sa Disyembre 11.
Apan pipila pa lang gani sa dili pa ang opening, gihamok og kontrobersiya kalabot sa pagkaon ug akomodasyon ang mga bisitang atleta gikan sa nagkalainlaing nasod.
Usa sa gireklamo mao ang giingong kikiam ug itlog nga maoy gidalit ngadto sa mga atleta.
Ang kikiam usa sa popular nga street foods sa nasod. Hinuon, kini hugtanon nga gihimakak sa mga nagpasiugda.
Apan lahi ang kasinatian ni Pacquiao sa dihang mibisita kini sa New Clark City diin didto gipapuyo ang mga atleta.
“Pumunta naman ako dun, wala namang kulang,” ingon niya. “Tinanong ko yung mga participants natin—yung Thailand, yung Indonesia. Sabi ko: ‘Hows the food?’ Sabi nila, very good. Tuwang tuwa sila so okay naman, wala namang problema.”
Nagduda si Pacquiao nga gigamit lang sa ubang politiko ang SEA Games.
Subli siyang nanawagan nga ihikling lang una ang mga isyu nga mihamok kalabot sa SEA Games, ug panahon na karon nga atong iitsa ang suporta ngadto sa Filipino athletes.
Iyang giingon nga sa pagkakaron dili lang una hisgutan ang mga problema ug kon unsa man gani ang kahiwi-an, hatagan dayon kini og solusyon.
“Saka natin pag-usapan yung mga problema. Kung ano yung mga pagkakamali natin, pag usapan natin at ituwid natin,” dugang sa senador.
Ngadto sa mga nagpasiugda, gisugyot ni Pacquiao nga unta maaksiyonan gilayon ang mga yangungo ug reklamo sa mga athletes ug sa mga bisitang partisipanti sa maong events.
Ingon niya nga dili pa uwahi ang tanan aron makabawi kon unsa man ang kakuwang nga nahimo. “May pagkakataon pa para makabawi kung may pagkukulang man. Makabawi at maipakita sa ating mga bisita na tayong mga Pilipino ay magaling pagdating sa pag estima ng mga bisita,” panapos ni Pacquiao.