MGA CEBUANA MIARANGKADA
Hinayhinay nang gipagawas sa bantugang babayeng mga atleta gikan sa Sugbo ang ilang kapasidad sa paghakot og mga medalya sa 30th Southeast Asian Games.
Sila si skateboarder Margielyn Didal, marathoner Mary Joy Tabal, cue artist Rubilen Amit, golfer Lois Kaye Go ug gymnasts Daniela de la Pisa pulos miarangkada sa ilang kampanya sa tagsatagsa nila ka mga event.
Si Didal, kinsa lumad nga taga Lahug, Cebu City ug kasamtangang Asian Games champion, nakasulod sa finals sa S.K.A.T.E. event kagahapon sa Sigtuna Hall sa Tagaytay City.
Gilupig ni Didal si Nyimas Cinta sa Indonesia sa semi-finals human niya gipukan si Shin Thant Thaw Dar sa Myanmar sa preliminary round.
Ning maong event, ang Pilipinas nakaseguro na’g gold medal gumikan kay ikaparang ni Didal sa finals ang usa sab ka Pinay nga si Christina Means.
Si Means milampos sa iyang tahas sa semis batok kang Kyandra Susanto sa Indonesia.
Ang finals ipahigayon karong adlawa.
Sa billiards, si Amit, kinsa lumad nga taga Mandaue City, mibangon gikan sa 0-4 nga biya aron lupigon si Nuanthakhamjan Sirapaporn sa Thailand, 7-5, sa labing una niyang duwa sa women’s 10-ball singles sa Manila Hotel Tent.
Human sa walo ka racks, si Amit padayong naggukod, 3-5.
Apan dala ang kasingkasing sa usa ka world champion, si Amit misagunson og upat ka mga daog aron tiklupon ang race-to-seven nga dinumbolay.
Sa kadaugan, nakasulod sa quarter-finals si Amit diin ikaharong niya si Bui Xuan Vang sa Vietnam.
Si Go, kinsa produkto sa Cebu County Club junior golf program, misugod sa iyang kampanya pinaagi sa pagtali og 71 puntos sa first round sa individual women’s golf competition sa Luisita Golf and Country Club.
Si dela Pisa, kinsa manytime Palarong Pambansa gold medalist dela Pisa, gilaumang makahatag sab og medalya sa nasod.
Mao kini ang labing unang pagsalmot ni dela Pisa sa Seag human sa iyang pagdominar sa Cebu City Olympics, Milo Little Olympics ug Central Visayas Regional Athletic Association.
Sa wala pa siya misalmot sa Seag, si dela Pisa nakadaog na og gold medal sa Liptov Cup 2019 sa Slovakia.
Ang Olympian nga si Tabal, kinsa dili malilong nga maoy labing bantugang babayeng atleta gikan sa Sugbo, modagan sa full marathon karong Disyembre 6 sa Clark, Pampanga.
Wala’y laing naa sa hunahuna ni Tabal kon dili ang depensaan ang iyang gold medal sa Seag.
Sa laing padayon ang paggunit sa Pilipinas sa liderato sa medal tally.
Mga alas 4:00 sa hapon kagahapon, ang Pilipinas nakatigom na og 54 ka gold medals, 35 ka mga silver ug 19 ka mga bronze.