Mayor Cortes walay pakabana?
Ang wa pag-pagsuspenso sa mga klase ni Mandaue City Mayor Jonas Cortes niadtong Lunes human gi-isa sa Pag-asa ang public storm signal No. 1 dinhi sa Metro Cebu area mahulog ba nga wala siya magpakabana ug dili siya concern sa kinabuhi sa mga tinun-an? Gipakayab sa Pagasa ang signal number 1 sa Metro Cebu ug signal number 2 sa northern Cebu nga base sa Executive Order No. 66, awtomatik suspension sa pre-school ug kindergarten.
Sila si Cebu City Mayor Edgardo Labella, Lapu-Lapu City Mayor Ahong Chan, Talisay City Mayor Samsam Gullas mi-anunsyo sa suspension sa mga klase niadtong Lunes pa sa kadlawon. Si Gov. Gwen Garcia mi-anunsyo na niadtong Dominggo pa sa gabii alang sa mga lungsod sa northern Cebu human kini gipa-ubos sa storm signal No. 1 ug pagka-ugma signal No. 2.
Diin man si Mayor Cortes nga wa man dayon siya makadeklarar? Matod pa sa iyang executive assistant, Atty. Edu Ybanez, kinsa public information officer (PIO) ubsa nga wa modeklarar ang mayor kay trabaho kuno sa taga Department of Education. So, taga DepEd ang gitumbok ug gibasol ni Atty. Ybañez. Gawas pa, wa usab morekomendar ang taga disaster kay wa kuno mosaka ang tubig sa Butuanon river.
Hesus maryosep, kanus-a pa diay ta mangandam, kon aduna nay mahitabo? Mas maayo siguro ipa-review ni Mayor Cortes ug Atty. Ybañez ang E.O. 66 nga napagawas niadtong 2012 pa diin naglatid sa awtomatik suspension/cancellation sa mga klase kon adunay kalamidad sama sa bagyo, baha ug uban pa. Tinuod, adunay katungod ang DepEd sa pagkanselar sa mga klase. Bisan gani ang school principal kon siya nasayod nga namiligro ang kinabuhi sa mga tinun-an.
Kon signal No. 1, automatic suspension sa pre-school,kindegarten ug elementary. Signal No. 2, high school ug signal No. 3, tertiary level ug kanselado ang mga trabaho sa DepEd. Apan ang susamang guidelines naghatag usab og gahum sa mga local government unit (LGUs) labi pa sa mga local chief executives (governor ug mayors) nga maka-suspenso. Nganong sila ni Labella, Chan ug Gullas naka-suspenso man dayon? Ayaw kog ingna nga illegal ang ilang pag-suspenso. Concern ba si Cortes sa kinabuhi ug siguridad sa mga tinun-an sa iyang dakyanan?
(bobbygnalzaro@gmail.com)