Until he loves me
Misuroy ko sa baybayon. Kon ingon ani nga hapon ug way klase kay adlaw man ron nga Dominggo, mohanggap gyud kog preskong hangin nga gikan sa lawod. Duol ra sa dagat ang among balay. Ug every weekend mopauli ko sa among lungsod unya mobalik sa siyudad pagka kadlawon sa Lunes kay tua man ko mag-eskuwela didto. Third year college na ko ron.
Unya nakita ko si Rennel nga naglingkod sa natumbang punoan sa lubi ug naglantaw sa lawod. Klaro sa iyang hitsura nga lawom kaayo ang gihunahuna. Magul-anon siya.
Ambot unsa kaha ang iyang gilantaw, ang barko ba nga nagpaingon sa Manila o ang mga mananagat nga namasol sa lawod.
Aw, ingon man gyud nuon ani si Rannel. Loner siya. Silingan ra mi si Rannel. Nasuheto na ko sa iyang pagka tawo. Biktima siya sa broken family. Naa siya magpuyo sa balay sa iyang lolo ug lola. Bugtong siyang anak ug ang iyang amahan ug inahan duna nay tagsa-tagsa ka gikapuyo ug duna na gani say mga anak.
Third year college na sab si Rannel ug sa siyudad nagtungha. Ang iyang lolo ug lola ang naggasto niya sa pag-eskuwela. Pulos retired teacher ang iyang mga apohan ug nagdawat og pensiyon.
Giduol ko si Rannel unya nangigham ko aron makalingi siya nako.
Mi-smile man tuod si Rannel pagkakita nako apan anang pinahiyoman nga gamay ra gyud ug way kadasig. “Ganina ka ra diha, Ester?” “Bag-o pa lang gyud, Ran.” Mitupad kog lingkod kang Rannel. Milantaw na sab siya sa lawod. Hilom kong naanugnan kang Rannel. Bright siya sa klase ug guwapo. Di maayo nga magpadala siya sa kaguol.
“Life must go on, Ran, bisan unsa pa ang nahiabot sa atong kinabuhi. Let’s fight frustration.”
Nanghupaw si Rannel ug mipasiplat nako. Apan mibalik lang sab sa paglantaw sa lawod. Gipasagdan ko na lang siya. Mitindog ko ug naglakaw-lakaw sa baybayon. Misunod si Rannel nako.
“Naka-move on na man ko sa akong sitwasyon, Ester. Gidawat ko na ang panagbuwag nila ni Mama ug Papa. Duna lang gyuy nakahasol nako. Naglisod kog sulbad.”
Mihunong kog lakaw. Giatubang ko si Rannel. Gusto n nakong mahibaw-an kon unsa ang nakahasol niya.
(SUMPAYAN)