Mga kalihokan alang sa pista sa La Inmaculada Concepcion sa Tomonoy

Mosaulog na usab sa ilang tinuig nga kapistahan ang ang Barangay Tomonoy, lungsod sa Moalboal, Sugbo alang sa ilang patron nga La Inmaculada Concepcion karong Disyembre 7-8, Sabado ug Dominggo.

Niadtong Nobiyembre 29, Dominggo, nagsugod na ang nobinaryo, lakip sa mga kalihokan matag adlaw alang sa maong kasaulogan.

Ang mga opisyal ug miyembro sa kapilya sa La Inmaculada Concepcion ang naghanay sa nobenaryo o pangadye matag gabii.

Samtang, ang dili relihiyusong mga kalihokan gipangulohan sa kagamhanan sa barangay.

Si Clinton Michael Cantila, chairman sa Sangguniang Kabataan (SK), uban sa mga opisyal nga barangay, nagkanayon nga gisugdan na ang mga ball games sama sa Inter-Barangay Open ug Inter Purok Basketball Tournament ug Womens Volleyball Open diha mismo sa ilang maanindot nga Barangay Covered Court.

Adunay parlor games nga ipahigayon sa adlaw sa kahulugan sa pista,

Nihatag sa iyang dakong tabang ug suporta ang maabtik nga si Barangay Kapitan Albert

Sam 'Dodong' A. Tabañag alang sa kalampusan sa maong tournament ug uban pang mga kalingawan.

Adunay mga tawo nga malumoy og kasingkasing nga atua sa gawas sa nasod ug gikan sa nagkadaiyang lugar sa Pilipinas nga lumad taga Tomonoy ang mihatag sa ilang suporta ug mga premyo sa maong kalihukan.

Moabag usab ang inilang grupo sa Barangay Tomonoy alang sa kalamboan sa maong pyesta.

Matod ni Kapitan Tabañag nga adunay mga premyo nga cash ug trophy and ipanghatag alang sa mga mananaug ug consolation prizes sa tanang misalmot sa maong torneyo.

Mosalmot usab ang mga lainlaing grupo, association ug organization o pundok sa Tomonoy sama sa Department of Education (DepEd), Fishermen Association, Farmers Association, Womens Organization ug uban pa.

Mopakita sila ug mga pasundayag matag gabii human sa novena.

Mga inilang maglilingaw sama sa variety show, singing contest, balak ug kinaraang sayaw nga gikan sa siyudad sa Sugbo ug nagkadaiyang dapit ang molingaw sa katawhan, ug mopaalegre sa pista.