Cesafi teams sa Minglanilla caging

Mga duwa ugma

6:30 pm. - Minglanilla vs.

Talisay

8:00 pm. - USJ-R vs. USPF

Ang panagsangka tali sa University of San Jose Recoletos (USJ-R) Jaguars ug Univesity of Southern Philippines Foundation (USPF) Panthers maoy moabli sa 2019 Minglanilla Mayor’s Cup Inter-Collegiate Christmas League karong Sabado, Disyembre 7, sa Minglanilla Sports Complex.

Kombinasyon sa mga beterano ug rookie players, sagad niini gikan sa ilang high school teams, ang gipaabot nga iparada ni Jaguars coach Leodie Garcia sa usa ka semanang kompetisyon.

“Sagad ani nila mga reserves gikan sa high school. Daghan man sab ang mawa nato sa sunod Cesafi season, so diri nato mahatagan og hashasan,” matod ni Garcia.

Lakip sa rookies nga nalista ni Garcia mao sila si Kendrick Rieken Abarquez, ang most valuable player sa niaging Cebu Governor’s Cup, ug Kevin Canaya Guibao, ang MVP sa 2019 Cesafi

Partner’s Cup.

Anaa usab si Ryzel Guillan Gilbuena nga makig-ayuda nila ni 2019 slam dunk king Miguel Gastador, Elmer Delvo Echavez Jr. ug Renz Solomon.

Sama sa USJ-R, ang USPF, sa ilang bahin, langkuban usab og mga bag-o ug batan-ong recruits nga makig-ayuda sa ilang mga beterano.

“Duna mi bag-ong na-recruit pero tan-awunon pa sab kon makauyon ba ta,” matod ni Brian Jereza, ang athletic chief sa USPF.

Ang Jaguars-Panthers encounter magsugod sa alas 8 sa gabii.

Apan sa dili pa sugdan ang maong panag-engkuwentro, ang pre-season game sa 2020 Gullas Cup teams tali sa Talisay Aquastars ug Minglanilla Archangels maoy magsilbing preliminary game sa alas 6:30 sa gabii.

Ang ubang mga partsipante sa Inter-Collegiate division mao ang defending champions University of the Visayas (UV) Green Lancers, Cesafi champions Southwestern University (SWU)-Phinma Cobras ug University of Cebu (UC) Webmasters.