MGA HINABANG SA YOLANDA VICTIMS NAPALGAN, DUNOT
Kananga, Leyte - Mga hinabang alang sa mga biktima sa bagyong Yolanda ning lungsod nga nangadaot nadiskubrehan sa local government unit (LGU.
Base sa inventory of items nga gipresentar sa kagamhanan, dunay mga sardinas ug mga medisina nga wa mahatag ngadto sa liboan ka mga biktima nga niadto pang 2016 na-expired.
Gawas niini, duna usay liboan nga bundle sa mga lapis, notebook ug mga sinina alang sa mga estudyante unta nga napalgan usab.
Duna usay mga tiles ug G.I sheets nga hayan abag unta sa pagpatukod og balik og mga balay.
Matod ni Municipal Administrator Attorney Adelito Solibaga, karon lang nila nadiskubrehi ang nangadaot nga mga hinabang nga gibutang sa duha ka stock rooms sa gymnasium sa lungsod.
Matod ni Mayor Matt Torres, iya kining paiimbistigar insidente ug patubagon ang angay manubag.
Posibleng mopasaka sila og kaso kon dunay makit-ang kalapasan ug pagpabaya.
“It is sad nga naa tay nakita nga kadtong niagi nga administrasyon, mag-usik-usik og pundo sa lungsod. Maayo ang intensyon, gipalit og relief or canned goods or school supplies, pero wa nila ma-distribute,” matod ni Torres.
Dugang ni Torres nga iyang ipatawag ang involved nga mga tawo aron maklaro ang tanan.
Ipaimbentaryo og balik sa mayor ang tanan butang ug pangitaan og paagi nga mahatag kini sa angay nga mga makadawat.
Gitug-an usab ni Torres nga ila usab susihon ang impormasyon nga dunay usa ka trak nga delata nga gilubong sa compound sa motorpool sa General Services Office.
“Kon naay angay pasakaan og kaso, atong pasakaan. Ato hatagan og hustisya ang mga taga Kananga,” dugang sa mayor.
Matod ni Solibaga, ilang ipasusi ang tanan nga records sa pagpalit sa mga gamit ug pila ang kantidad niining tanan./