Paghangop sa bag-ong tuig
Nagtapok na sab ang mga sakop sa akong pamilya dinhi sa akong balay ning bisperas sa Bag-ong Tuig. Hilabihan namong sadyaa sulod sa balay. Didto sa gawas, sa tugkaran sa among mga silingan ug sa daplin sa dalan, nagpaka-paka na ang nagkadaiyang pabuto alang sa pagsugat sa Bag-ong Tuig. Naglagubo sab ang diskohanong tugtog sa sound system nga gimontar sa daplin sa dalan. Sa sulod sa balay giplastada na sa lamesa ang giandam nga mga pagkaon alang sa Media Noche nga among salohan inighagtok sa alas dose sa tungang gabii inig-abot sa Bag-ong Tuig.
Dihang hapit na mohagtok ang alas dose tungang gabii misamot gayud ang kasibaw ug kaalingisig sa palibot tungod sa nagpadayon nga paka-paka ug buto-buto sa mga rebentador ug ubang pabuto, lakip na ang kalanggis sa mga turutot. Ang pinangga kong kapikas, mga anak, umagad ug apo isig bunot og tulunggon nga diha sa sulod sa balay: plato, kutsara ug tenidor, tabon sa kaldero ug mga lata aron dukdukon ug patingugon pagsugat sa Bag-ong Tuig.
Nagdungan mig singgit tungod sa kalipay. “Malipayon ug bulahang Bag-ong Tuig natong tanan!”
“Happy New Year, Luz!” Gigakos ug gihagkan ko ang akong asawa.
“Happy New Year sab, Fred!” ni Luz nga mibalos paggakos ug paghalok kanako.
Nagginaksanay ming mga sakop sa pamilya. Human sa tumang kasadya sa pagsugat sa Bag-ong Tuig, nagdungan ming tanan pagsayaw sa hawanan nunot sa diskohanong tugtog sa among stereo sound system. Dayon, malipayon ming nangaon sa mga pagkaon sa Media Noche ug gitilawan ang nagkalainlaing mga prutas nga mga lingin.
Nagpahiyom ko nga nanambo sa among bentana. Sadya usab kaayo ang among mga silingan nga nanagsayaw sa tugkaran ug nagtagayay sa bino ug beer. Mihangad ko sa langit nga namungingi sa mga bituon ug namalandong.
“Ginuo, laing hagit na sab ug mga pagsulay ang nagpaabot ug masinati nako ning pag-abot sa tuig 2020. Apan dawaton ko kini kay Imo mang pagbuot.” Nagkitabkitab ang akong baba nga naghunahuna sa paghiabot ning laing tuig sa akong kinabuhi uban sa akong asawa ug tanang sakop sa pamilya. “Bag-ong Tuig, hangpon ko ikaw. Dayon, dayon! Timaan ka sa laing lahutay sa pagpakigbisog aron hingpit na gyud kong mahiusa sa Ginuo uban sa akong pamilya!”
Nabalda ang akong pagpamalandong dihang misibaw sa tugkaran sa akong mga silingan ang kusog nga singgit nga nagsangpit sa akong ngalan ug mitimbaya kanako sa usa ka Malipayon ug Bulahang Bag-ong Tuig!