BUS TERMINAL TEMPORARYONG IBALHIN SA CSCR
Gipahibalo ang tanang mga pasahero nga mouli padulong sa habagatan atol sa pista sa Sinulog, Enero 19, nga mokuha og passenger pass sa Cebu South Bus Terminal (CSBT) aron panahon nga moabli na ang kadalanan makasulod dayon sa terminal.
Kini maoy gipahibalo ni Carmen Quijano, CSBT head, sa Superbalita Cebu.
Matod ni Quijano nga human gikompirmar ug gitugutan na sa gobernador nga temporaryo nga pagbalhin sa terminal sa Cebu South Coastal Road (CSCR) usa ka pagpulong ang gipahigayon sa mga opsiyal og bus liners sa CSBT alang sa maong mando.
“Adto gyud baya didto kay duna na baya’y finality gyud si Gov nga adto na gyud sa SRP, so atong buhaton ana all konduktor magpabilin gyud sila og duna gyud silay ibilin nga maghatag og passenger pass diha ra sa CSBT”, matod ni Quijano.
Temporaryong ibalhin ang CSBT sa El Pardo Industrial Roads habig sa Cebu South Coastal Road (CSCR) sugod alas 3:00 sa buntag sa Enero 19, 2020 hangtod na sa adlaw sa pista.
Kini aron may mahimong ka parkingan ang mga importanti nga mga bisita sa dakbayan atol sa Sinulog.
Mao usab kini ang himuon nga headquarters sa Provincial Disaster Risk Reduction and Management Office (PDRRMO).
Gipahibaw usab ni Quijano nga ang mga bus lang ang ibalhin sa CSCR ug walay labot ang mga nagdumala sa CSBT ingon man ang mga konduktor.
Ang mga bus liners gi-abisohan nga mag bilin og mga konduktor sa CSBT aron mao kini ang mo isyu og passenger pass sa mga pasahero nga buot muoli human sa pista aron nga dili na kinahanglan nga mag linya og maghuot pa kini sa Natalio Bacalso Avenue ning dakbayan.
“kay wa man ta mahibaw, kay if ang Citom muingon na nga ready na kay manud na ang mga sakyanan unya ang mga tawo inig human sa festival manulod naman na ang uban diri so makapasud ta nila ug makaplastada na ta nila,” matod ni Quijano.
Gilaoman sa CSBT ang pagdagsa sa mga pasahero hinungdan nga naka standby usab ang mga personnel sulod sa terminal.
Hangyo ni Quijano sa mga pasahero nga musubay lang sa kon unsa ang direksyon sa terminal aron mahimong hapsay ang pag pauli niini.