Love is not enough

Morag wa lang tingali sa hunahuna ni Abraham nga mikupot sa akong kamot. Nabatyagan ko ang pagpamuwa sa akong nawong ug dali kong gibira ang akong kamot nga iyang gikuptan. Mikupot ko sa bukton sa akong boyfriend.

“Kining, Abraham, si Matteo, akong boyfriend.”

Nakita ko ang pag-blush sa nawong ni Abraham. Mipahiyom man tuod siya kang Matteo apan klaro nga pinugos lang kini.

“Nice to meet you, Matteo.” Mitando si Matteo ug gidawat niya ang kamot ni Abraham. Nakiglamano si Abraham kang Matteo.

“Sige, mouna lang ko ninyo,

Jean, Matteo.”

Wa na maghuwat si Abraham og tubag gikan namo ni Matteo. Mibiya dayon siya. Nakatan-aw ko kang Matteo. Nagkusmod siya ug klaro nga nagselos na sab.

“Kinsa si Abraham sa imong kinabuhi, Jean?”

Pinabusdak ang tingog sa akong boyfriend. Kalma lang ko kay nakahibawo ko kon unsa ang gibati ni Matteo niadtong tungora. Sure ko nga nagduda siya kang Abraham nga dunay kalambigitan sa akong kinabuhi.

“Klasmet ko siya sa hayiskol, Mat. Close friend ko siya.” “Close friend lang kaha, Jean?” Nangisog na gyud si Matteo. Mitan-aw namo ang mga tawo nga diha sa among duol nga nakadungog sa kaisog sa tingog ni Matteo.

“Nagduda na ba sab ka nako, Matteo? Ang tanang laki nga makig-estorya nako isipon mo ba sila nga akong boyfriend kaniadto?”

Bisag nasuko ko apan nagpugong lang ko sa akong kaugalingon. Hinay lang ang akong tingog.

Nanghupaw si Matteo. Nakasabot tingali nga nahiubos na sab ko niya.

“Okey, Jean. Sorry. Kalimtan na nato si Abraham.”

Wa koy tingog hangtod nga nahiabot ko sa among balay. Gihatod ko ni Matteo. “Nasuko ka nako, Jean?” Ning higayona nag-smile na si Matteo. Sagunson kong nanghupaw.

“Wa na, Mat. Ganina nasuko ko nimo. Hinay-hinay lang og pasangil nako, Mat.”

Mitando si Matteo. Unya sa wa pa siya mobiya nako, gihagkan ko niya sa lips apan kadiyot ra. Miwara-wara siya nako. Nakapanglingo na lang ko.

Midiretso kog sulod sa akong kuwarto. Wa ko lang kalikayi nga mahunahuna si Abraham. Misamot siya kaguwapo sa akong tan-aw niya karon. Ngano kahang karon pa man nako siya makita? Diin kaha siya gikan? Ngano kahang nawala man siya pagkahuman sa among gradwasyon sa hayiskol?

Hilom kong nakaingon.

(SUMPAYAN)