MAAYOG PERFORMANCE SA SUROY SUROY GANTIHAN

Aron mas mahimong exciting ug mahatagan og bili ang mga paningkamot sa matag lungsod atol sa Suroy Suroy sa Sugbo sa Northern Escapade, gipahibawo ni Gobernador Gwendolyn Garcia nga mohatag siya og ayuda o proyekto sa lungsod nga makakuha og labing dako og rating gikan sa mga partisipante sa Suroy Suroy karong Enero 22-24, 2020.

Matod ni Garcia nga pinaagi sa usa ka evaluation sheet, mahimong gradohan sa mga partisipante ang lungsod nga bisitahon atol sa kalihukan.

May 15 ka mga lungsod ang mopasundayag sa lugar og delicacies niini.

Lakip niini ang Consolacion, Compostela, Carmen, Sogod, Daanbantayan, Medellin, San Remigio, Santa Fe, Madridejos, Bantayan, Bogo, Tabogon, Borbon, Catmon ug Liloan.

Magbase ang pag grado niini kon unsa ka nindot ang kasinatian ug presentation sa matag lungsod.

Sa naobserbahan ni Garcia nga sa unang Suroy-Suroy sa Southern Heritage Trail, nangandam ang mga lungsod alang sa maong kalihukan.

“Sa south this time, wala na nato gibuhat usa kay mao pa’y atong pagbalik. I didn’t know what to expect but really the LGU’s perform splendidly”, matod ni Garcia.

Ang matag Lungsod gigahinan na og P300,000 matag usa alang sa pagpangandam sa maong kalihukan.

Matod ni Garcia nga ang may labing taas nga grado nga lungsod may ganti nga proyekto gikan sa lalawigan.

“Project, I think better project focused on infrastructure… mas maayo ang project kay naa’y lasting value”, matod ni Garcia sa mga tigbalita sa Miyerkules, Enero 14, 2020.

Base sa final nga lista sa Provincial Tourism Office (PTO), gibutyag niini nga may moabot 305 ka mga partisipante na ang mikompirma nga mosalmot sa Suroy-Suroy sa Sugbo Northern Escapade.

Sagad sa mosalmot mga retiree, langyaw ug mga balikbayan.

Gibutyag ni PTO officer, Maria Lester Ybañez nga andam na ang unom ka mga bus nga masakyan niini nga mao ang Silverlines ingon man ang mga resorts nga puy-an niini.

Human sa Suroy Suroy sa Norte, mosunod ang Suroy-Suroy na sab sa Isla sa Camotes sa Abril 9 -10, 2020 ug sundan sa midwest sa Hunyo 12-13, 2020. /

/FILE ■ PAGKAON: Mga nangapil sa Suroy Suroy sa Sugbo Southern Trail nangaon sa giandam sa lungsod sa Dalaguete. Si Gobernador Gwendolyn Garcia nakadayeg sa performance sa mga lungsod sa habagatan. Busa nakahukom siya nga ang lungsod nga maayog performance sa norte gantihan na ug sa mosunod pang mga Suroy Suroy.