Menina, Mantilla, Pingoy moapil sa D-league Draft
Tulo ka mga inilang Sugboanong pointguard ang mosalmot sa 2020 PBA D-League Draft nga gikatakda karong Dominggo, Enero 19, 2020 didto sa Kaulohan.
Kini mao sila si Darrell Shane Menina, Jaybie Mantilla ug ang Manila-based nga si
Jerie “Koko” Pingoy.
Moabot ngadto sa 137 ka mga amateur cagers ang moapil sa maong drafting.
Si Menina, lumad nga taga Talisay City ug produkto sa University of Cebu Webmasters, aduna pa untay playing years sa Cebu Schools Athletic
Foundation, Inc. (Cesafi) apan nakadesider na kini nga di na motiwas ug adto manimpalad sa D-League, ang hagdanan paingon ngadto sa PBA.
“If ma-draft ko, in God’s plan na na. Ready ko as always sa mga challenges para lang sa akong future og buhaton tanan ug practice always gihapon especially kung unsay weaknesses nako,” matod ni Menina sa dihang gikahinabi ni Jonas Panerio sa Sun.Star Cebu.
Sa iyang bahin, ang taga
Suba-Pasili nga Mantilla, onetime most valuable player (MVP) awardee sa Cesafi ubos sa University of San Jose Recoletos (USJ-R) Jaguars, nibalik na usab karon sa Cebu-Casino Ethyl Alcohol sa Maharlika Pilipinas Basketball League. Sa niaging tuig, nakaduwa usab siya sa University of the Philippines sa UAAP didto sa Manila.
Samtang si Pingoy, anak sa kanhi PBA player nga si Jerry Pingoy, sama kang Menina nakaduwa usab sa UC Baby
Webmasters sa wala pa kini mobalhin sa Far Eastern University (FEU) sa kaulohan.
Lumad nga taga Apas-Lahug, dakbayan sa Sugbo, si Pingoy nahisakop usab sa Ateneo sud sa usa ka season sa wala pa kini motapon sa Adamson University.
Ang kauban ni Mantilla sa Casino ug sa USJ-R Jaguars nga sila si Nichole Ubalde ug Fletcher Galvez ang misumiter usab sa ilang aplikasyon sa drafting.