Tibuok Cebu City i-disinfect

Ang Cebu City Government mopahigayon og disinfection sa tanang mga dapit sa siyudad, hilabi na sa mga nanaguna ug sudlunon nga dalan nga adunay daghang mga tawo nga mangagi o namuyo.

Kini ang gipahibawo ni Mayor Edgardo Labella sa mga tigbalita aron usab mapatay ang mga kagaw nga anaa sa karsada, labina ang novel coronavirus nga nagdala sa coronavirus disease (Covid-19).

"Hangtod ma-cover nato ang tibuok dakbayan sa Sugbo, we will have a massive disinfection," padayag ni Labella atol sa iyang pakighinabi sa mga tigbalita sa Lunes sa hapon, Marso 30, 2020. Ang massive disinfection gisugdan sa Department

of Public Services (DPS) sa Martes sa kaadlawon.

Ang disinfection magpadayon hangtod nga ilang malukop ang tibuok siyudad.

Si Atty. Jigo Dacua, pangulo sa DPS, kinsa gitahasan sa mayor na mangu, nagkanayon nga andam na ang mga personnel sa pag-disinfect sa mga karsada.

"Daily nato buhaton sa lainlaing mga streets until ma-lift ang ECQ ug safe na ang atong siyudad," padayag ni Dacua.

Ang pangulo sa DPS nitug-an nga adunay dagko nga mga water tanker ang ilang buhatan para maoy gamiton.

Kon kini magkuwang, makig-alayon sila sa Bureau of Fire Protection (BFP) alang sa dugang trucks.

SURVEILLANCE UG MONITORING

Samtang gipadayag ni Labella nga mopahigayon og monitoring and surveillance ang City Health Department ug barangay health workers para masuta ang mga tawo nga adunay Influenza like illness ug mahatagan gilayon og aksyon.

Ang mayor nagkanayon nga ang gihimo karon sa siyudad makonsiderar nga 50 porsiyento ra para sa hingpit nga pagwala sa Covid.

Ang laing 50 porsiyento mao ang pagsuhid sa mga lumolupyo bahin sa kahimtang sa ilang panglawas ug kon adunay ILI, atimanon dayon sa mga medical personnel.