Unsay papel sa Milo?

Mitumaw karon ang mga daghang reklamo nga gipadayag diha sa social media kalabot niining pag-implementar sa mga lagda ubos sa enhanced community quarantine (ECQ) sa Sugbo. Dinhi sa dakbayan, dili man tuod tanan apan dunay mga alegasyon nga gipamolitika ang pag-distribute sa mga ECQ forms, lakip na usab ang pagpanghatag og mga relief goods ngadto sa mga tawo.

Matod pa nga dunay mga kapitan ug barangay officials nga kadto lang ilang mga dumadapig ug mga supporters maoy gihatagan og prayoridad apan kon identified ka sa laing partido lisodlisoron ka sa hinabang.

Kini dakong sukwahi sa gipasalig sa dakbayan nga way pili-on kon si kinsa ang hatagan sa mga hinabang.

Alang niadtong mga barangay officials nga nagbuhat sa ingon dili kini maoy panahon sa pagpamolitika. Taliwala ning dakong hulga ug hagit sa atong kinabuhi, ang pagtinabangay, inunongay maoy atong ipatugbabaw.

Dili usab karon panahon nga kita magpabilib ug mopayukbo sa atong isig kaingon. Patas nga pagtratar ang gikinahanglan nga dili mopili og kolor sa politika.

Apan ang laing komplikasyon nga mitumaw usab karon sa dakbayan mao kining presensiya sa bag-ong gitukod ni Labella nga mao ang Mayor’s Information and Liaison Office (MILO) sa barangay.

Kini maoy nakapabaton og kalibog sa mga residente kay daw og sa mikopetensiya na man usab kini siya sa Kapitan. Dunay mga taho nga kini sila naghimo pod og lista kay sila lagi kuno ang gitugyanan sa mayor nga mohatag sa mga hinabang. Kini maoy nahimong tinubdan sa kagubot ug kaguliyang.

Masabot nga hinungaw pa hinuon kini ning bag-ong pag-implementar sa ECQ, apan hinaot nga mahatagan kini og igong kasulbaran sa mayor samtang dili pa uwahi ang tanan.

Unsa man gyud diay ang papel sa Milo ning krisis karon, Mayor? Pangutana lang…