Nagkayagaw sa lockdown

Sa pangutana kon andam na ba ang atong mga lokal nga kagamhanan sa implementasyon sa ‘enhanced community quarantine’ o lockdown, ang tubag dili pa gyud.

Kini gumikan sa daghang buslot ug walay klarong koordinasyon sa mga nagkalainlaing local government units.

Nagkayagaw ug nagkagubot diin klaro kaayo nga walay tarung koordinasyon sa mga lider.

Sa termino pa lang daan, wala na sila magkasinabot. Si Cebu City Mayor Edgardo Labella migamit sa pulong nga ‘enhanced community quarantine’ samtang si Gov. Gwen Garcia migamit sa termino nga ‘lockdown’.

Pero mao ra god ning iro-a apan lahi-lahi lang ang pangalan. Unsay hubad aning duha ka pulong? Usa ra gyud. Pagpuyo sa balay o stay at home kon walay importanteng lakaw.

Nganong sa implementasyon, wala man sila magkadungan sa petsa?

Ang Cebu City niadtong Sabado sa udto. Sa Lapu-Lapu City niadtong Marso 27 samtang sa Kapitolyo gahapon sa kadlawon.

Resulta sa wala pagdungan, naglibog ug nangaratol ang mga tawo. Dili nimo na magpanik nga sa hugon-hugon pa lang sa lockdown, nagdasok na sa mga supermarkets, grocery stores ug mga botika.

Unya diay niadtong Sabado nangayo og exemption si Gov. Gwen sa dakbayan pinaagi ni Konsihal Raymund Garcia nga tugutang makabiyahe ang mga buses.

Apan ang mga pulis nga nag-checkpoint sa Bulacao wa toguti nga makagikan ang mga Ceres buses nga nagkarga og pasahero pa-ingon sa probensiya ug gipakanaug og gipabaklay balik sa siyudad.

Ulbo ang kaspa ni Gwen uy ug iyang gibalikas ang usa ka police officer. Mibahad si Gwen nga iyang sirad-an ang border o utlanan sa dakbayan ug sa probensiya.

Iya man gani nga gi-ingnan ang mga employers nga mag-andam og kapuy-an alang sa ilang mga empleyado kay dili na makasulod ang taga probensiya sa dakbayan ug nga ang ania sa dakbayan dili na usab makagawas.

Laing, nagkagubot mao ang pag-apod-apod og ayuda og quarantine passes. Paet!