Panahon karon sa pagmuni-muni

Kumusta na mo diha mga suki? Hangtod kanus-a pa kaha ni atong mga pag-antus no?

Daghan ang nakalitan sa mga panghitabo ug bisan ako wa ko magtuo nga puwede diay ni mahitabo sa atong kinabuhi.

Daghan ang nawad-an og trabaho. Daghan ang mga nailo. Pinakaapektado ang atong ekonomiya. Kon magdugay pa ni asa kaha ta puniton?

Dili sad ta kabasol kon daghan ang nag-panic kay wa na may public transport ug dili na ta kagawas kon way quarantine pass.

Okay ra kon ikaw rang usa. Pero kon duna kay pamilya ug ikaw pa ang bread winner mag-rigor gyud ang imong hunahuna.

Abi nako sa salida ra ni sa sine mahitabo. Pareho adtong Train To Busan nga gipang-lockdown ang mga border aron dili makasud ang mga zombie.

Pero maayo na lang ni ato kay walay zombie. Mosunod lang ta sa lagda nga “stay at home” ug “social distancing.” Ingon ana ra ka-simpol. Aron dili na mokuyanap ang virus.

Ang importante ang kaluwasan sa matag-usa ug aron mahibalik na sa normal ang tanan.

UNSAY BUHATON?

Niay pipila ka mga tip kon unsay maayong buhaton samtang naka-quarantine sa tagsa-tagsa ka mga panimalay.

Una, mag-ehersisyo aron dili magluya. Magpakisayud sa mga balita sa mantalaan, radyo, TV o internet.

Pamalandungi ang mga nahitabo ug himoang inspirasyon sa higayon nga mobalik na sa normal ang tanan.

Kon buhi pa ang inyong mga ginikanan ug mga apohan mas maayong suliton ang higayon sa pagpakigbonding nila.

Blessing in disguise sad ni aron makabaton mo’g panahon sa mga edaran ug katiguwangan. Usahay sa atong ka-busy makalimot ta nga dunay mga binuhat nga nagkinahanglan usab sa atong pag-amuma.

Panahon sad karon nga atong lig-unon ang atong relasyon sa Kahitas-an.

Ang nahitabong krisis sa coronavirus nagpamatuod lang nga pareho ra tang tanan bisan unsa pa may atong posisyon. Kabus man o adunahan. Way gipili.

Sa mga nangutana, yes, padayon gihapon ang operasyon sa SunStar ug Superbalita. Mabasa ug mapalit gihapon mi ninyo sa mga suki ninyong palitanan.

Sa mga way internet mahimo ko ninyong i-text sa 09158038786. Magbinalitaay ta kon unsa nay inyong sitwasyon diha. Puwede natong i-publish ang inyong mensahe dinhi ug sa website sa Superbalita.

Please stay safe. God bless.