Stay at home

Naghilom si Dave samtang gipadagan niya ang iyang sports car pabalik sa siyudad. Hilom sab kong naglagot.. “Nindot pa untang ipahuway og kadyot didto, Dave, pero makalagot tong duha ka polis. Nagsigeg tan-aw nako.”

“Di ka angay maglagot nila, Roxan. Ako ang angay nga maglagot.”

Gitan-aw kog dugay si Dave. Seryuso siya. Gikuhit ko siya sa kilid ug gihagkan ko siya sa aping. Nahimuot ko sa akong nasaksihan niya karon. First time pa kong naka-experience niya ani since sa among paghigugmaay.

“Sus, nagselos ka, no?” Mipasiplat si Dave nako. “Aw, kinsa man say di magselos bi? Pilit kaayog tinan-awan tong duha ka polis nimo.”

Mikatawa kog kusog. Nalipay ko,nindot sab diay ning magsselos ang atong boyfriend nato? Kilig to the max ang gibati kong kahimuot.

“Natural man lang gyud nga dunay mo-admire nako, Dave, kay guwapa man ning imong uyab.”

Gisulug-sulog ko ang akong boyfriend.

“Modiretso na tag pauli, uy, Roxan. Nawad-an kog gana sa atong pagpanuroy.”

Miseryuso ko. Tinuod gyud nga nasuko si Dave, mao ni akong napanid-an niya. Karon pa ko kamatikod niya nga mibati og ingon ani karon.

“No, Dave. Manuroy pa ta. Ayaw lang gud kasuko. Don’t forget, ikaw ra ang akong love.”

Wa magtingog si Dave apan mi-smile siya nako. Mikidhat pa. Mikidhat sab ko niya.

Unya gipakusgan ni Dave sa pagpadagan ang sports car. “Asa man ta, Roxan?” Naghunahuna ko. “Adto ta sa Beverly Hills, sa Chinese Temple. Nindot sab didto kay overlooking.”

Wa motubag si Dave apan mitando siya. Gisandig ko ang akong ulo sa abaga sa akong boyfriend kay gusto kong ipabatyag niya ang akong love ngadto niya. Gipahinayan ni Dave sa pagpadagan ang among gisakyan. Ingon gyud ani si Dave. Mainampingon sa pag-drive.

Pag-abot namo sa Chinese Temple, nagtapad mig lingkod sa duol ani ug naglantaw mi sa siyudad. Nabatyagan ko ang kamingaw sa siyudad, morag gost city. Nahitabo kini tugod sa Coronavirus.