Gipusil tungod sa babaye?

Love triangle ang nagunang motibo nga gisubay sa kapulisan sa pagpusil sa usa ka security guard pasado alas 7 sa Miyerkules sa buntag sud sa balay nga giabangan niini sa may Phase -2, Sityo Kadasig, Barangay Tisa, Siyudad sa Sugbo.

Si Police Staff Sgt. John Errick Samosa sa Labangon Police Station, niingon nga hayan ribal sa babaye ang motibo sa pagpusil kang Aldrin Larasan, 22, nag-abang sa balay diin siya gipusil.

Samtang inisyal nga kasayuran nga ilang nakuha, ilang nailhan ang gunman nga usa ka Jerry.

Bisan siya nagsul-ob og face mask ug nag jacket, nailhan gihapon si Jerry.

Dugang ni Samosa nga sa wa pa mapusili, sila si Larasan ug kaubang gwardya nga si Arniel Duterte nagkuyog sa balay sa biktima aron didto mamahaw.

“Kaning duha daw dungan ni sila nga mi off sa duty. Mao to nga nagkuyog pauli. Pila ka mga minuto daw nakadungog na og buto kining si Duterte nga atoa sa ibabaw (taas sa balay). Giingong duna daw gikuha sa taas,” asoy ni Larasan.

Si Larasan naigo sa wala nga bahin sa liog.

Dali siyang gidala sa medical team sa Cebu City Medical Center.

Inisyal nga gitan-aw karon sa Labangon Police mao ang personal grudge ug love triangle.

Ilang nasayran nga si Larasan dunay karelasyong babaye nga nailhan lang sa alyas nga Madam.

“Amo pa ning i-follow-up kon kinsa ning Madam kay mao man daw ni ang nauyab uyab sa gwardiya, aron makakuha ta og dugang impormasyon.Wala pa pud ta kasuta gyud og kaning ilang giingon nga uyab sa biktima minyo ba o dalaga sa pagkakaron,” dugang ni Samosa.

Samtang si Duterte nitahan sa Labangon Police Station aron malimpyohan ang pangan tungod kay niabot sa iyang kasayuran nga siya ang mipusil kang Larasan.

Si Duterte nga nahinabi sa Superbalita Cebu, niingon nga wa siya sa silong sa balay dihang gipusil si Larasan.

Iyang gikompirmar nga si Larasan dunay relasyon sa us aka Madam.