2 GIHIGTAN OG ALAMBRE SA LIOG, PATAY
GITUOHANG GI-SALVAGE, GILABAY SA CAMPO 4 SA TALISAY
Duha ka mga tawo napalgang patay sayo sa Sabado sa buntag, Abril 11, 2020, sa Barangay Campo 4, Dakbayan sa Talisay.
Sila gipangpatay pinaagi sa pagtuok sa ilang mga liog gamit ang mga alambre.
Gituohang sila gipatay sa laing dapit ug gilabay sa lugar tungod sa kamingaw niini samot na kay gipatuman ang enhanced
community quarantine (ECQ) sa Sugbo tungod sa hulga sa coronavirus disease (Covid-19). Usa sa mga biktima nga si Alvin Medillo, 32, truck helper, taga Sityo Silangan 2, Barangay Tinago, Dakbayan sa Sugbo niadto pang Biyernes Santo gipangita sa iyang pamilya kay wa na mahiuli.
Ang iyang kaubang napalgan usab nga patay giila lang nga si Enriquez, truck driver.
Si Patrolman Dino Salazar sa Talisay City Police Station, niingon nga nakadawat sila og kasayuran nga dunay duha ka mga lalakeng patay nga napalgan sa dapit.
Unang kasayuran nga ilang nadawat nga ang mga biktima gipamusil.
Matod ni Salazar nga sa ilang pag-abot sa sityo Bogo, Campo 4, diha ang mga lawas nila ni Medillo ug Enriquez sa bakilid, daplin sa dan.
SAKSI
Si Salazar niingon nga dunay mga saksi nga nakakita nga nianang Biyernes Santo sa mga alas 11 sa gabii, dunay usa ka sakyanan nga nihunong sa dapit diin nakaplagan ang mga lawas
"Ang nakakita, Sir, pagkakita sa sakyanan unya nakita niya nga dunay gilabog, iya pa daw nga gisinggitan nga ayaw mo dinha paglabay kay di na dinha basurahan. Apan wala na daw maminaw ug nagpadayon og labay sa duha ka higayon," asoy ni Salazar.
Wa na lang usab manumbaling ang saksi kon unsa ang gipanglabay.
Mga pasado alas 5 sa kaadlawon na nianang Sabado de Gloria diha na nila masuta nga patay nga mga tawo ang gipanglabay.
Mga pasado alas 6 na sa buntag napahibawo sa mga barangay official ang kapulisan.
Sa paghiling sa mga sakop sa Scene of Crime Operatives (SOCO), wa silay nakita nga mga samad pinusilan.
Wa usab silay nakuhang bisan unsang identification (ID) card.
"Gawas lang sa lama sa liog nga agi'g hiniktan unya milagom na ang nawong,” dugang ni Salazar.
Nagtuo sila nga ang duha gipangtuok gamit ang mga alambre nga naa pa sa ilang mga liog nahabilin.
Duna say mga bun-og sa ilang mga lawas, timaan nga sila gipangkulata una patya.
Si Campo 4 barangay councilor Dennis Gomez niingon nga maninguha silang mabutangan og closed circuit television (CCTV) camera ang dapit.
GIILA
Sa St. Francis Funeral Homes, naabtan sa Superbalita Cebu si Gemmalyn Sayson, 35, kapuyo ni Medillo, nga niila sa iyang lawas.
Si Sayson niingon nga ang iyang kapuyo maoy helper ni Enriquez kon magmaneho kini og truck.
"Kanang Enriquez, Sir, mao na ang tawganan nila sa akong kapuyo niya," dugang ni Gemmalyn. Matod ni Gemmalyn nga nianang Biyernes sa udto, iyang gihatagan og P2,000 si Medillo aron ipalit og tambal sa ilang anak.
Dihang iyang nabantayan nga wa makadala og resita ang iyang kapuyo, iyang gitawgan ang cell phone niini, apan di na ma-contact.
"Hangtod nga nag alas singko na lang sa hapon, Sir. Miabot ang gabii, hangtud nag buntag sa Sabado wala gyud makauli. Mao to nga among gipangita," asoy ni Gemmalyn.
Ang inahan ni Medillo nga wa nihatag sa iyang ngan niingon nga iyang nakit-an ang iyang anak ug si Enriquez nga nagkuyog nianang Biyernes sa udto.
Dunay nakasulti kanila nga “gidampot” ang duha gawas sa usa ka mall sa North Reclamation Area.
Ila kining gipangita sa mga buhatan sa kapulisan, apan napakyas sila.
Usa ka pulis sa Mabolo Police Station nitambag kanila nga moadto sa funeral parlor kay dunay duha ka mga lawas nga nakaplagan.
Si Gemmalyn mabdos og lima ka mga buwan.