31 nasikop sa tigbakayan
Moabot sa 31 ka mga tawo ang nadakpan sa kapulisan nga nagtigbakay niadtong Biyernes Santo, Abril 10, 2020 sa managlahing mga dapit sa Sugbo.
Ang labing daghan og nasikop mao ang Danao City Police Station, diin 21 ka mga tawo naatlan nga nanugal sa tigbakayan.
Ala 1 sa hapon, nakadawat og impormasyon ang Danao City Police Station nga adunay nagpatigbakay sa Barangay Guinsay.
Dali nila nga girespondehan, nga gipangulohan ni Police Senior Sergeant Mark Anthony Mata, diin 13 ka mga tawo ang nadakpan.
Dul-an sa tulo ka oras ang milabay o mga alas 3:50 sa hapon, laing tawag sa telepono ang ilang nadawat labot sa tigbakay sa Barangay Suba sa maong siyudad, upat ka mga tawo ang ilang nadakpan.
Pagka alas 4 sa hapon, ang Police Community Precinct sa bukirang dapit sa siyudad sa Danao nakadawat na usab og tawag gikan sa nagpakabana nga mga lumolupyo sa Barangay Santican nga adunay nagtigbakay.
Niresulta kini sa pagkasikop sa upat ka mga tawo.
Ang 21 ka mga dinakpan nabalhog na sa selda sa Danao City Police Station samtang giandam na ang kaso nga ipasaka batok kanila karong Lunes.
Matod ni Police Lieutenant Colonel Maribel Getigan, hepe sa kapulisan sa siyudad sa Danao, nga inay mag home quarantine ang mga tawo tungod sa gipatuman nga enhanced community quarantine, nagtapok na hinuon aron magtigbakay.
"Let this be a warning to all. The enhanced community quarantine being strictly implemented by the composite team and all other government agencies concerned and with full support from the LGU of Danao City has not distracted our attention from curbing all sorts of criminality, including gambling. Instead, this has made us even more focused and determined in curbing crimes, so people better behave and cooperate," matod ni Getigan sa usa ka pamahayag.
CEBU CITY
Samtang sa dakbayan sa Sugbo nakasikop usab ang kapulisan og 10 ka mga tawo nga nagtigbakay atol sa Biyernes Santo.
Ang upat niini sa sitio Puso, Barangay Buhisan ug unom sa sitio Sainai, Barangay Tisa.
Ang mga nangadakpan sa Buhisan mao silang Jerson Auxilio, 28; Rolando Robles, 45; Expideto Arsenal, 62; ug Felix Taboada, 57, mga lumolupyo sa sitio Puso.
Ang mga nangadakpan sa sitio Sainai Tisa mao silang Grisaldo Seco, 38, taga Sun Flower, Tisa; Jonas Tuso 31; Ernesto Timtim, 60; Melvin Tuquib, 47; Joel Tuso, 28; ug Jose Mendo ,39, pulos nagpuyo sa maong barangay
Ang Labangon Police Station ni-roving human makadawat og tawag sa telepono nga adunay nagtigbakay sa maong mga dapit bisan sa gipatuman nga ECQ.
Ang mga dinakpan mag-atubang og kasong may kalapasan sa Presidential Decree 1602 kun illegal gambling nga ipasaka ugmang adlawa.
Hayan mapun-an pa kini tungod sa ilang paglapas sa mga executive order sa ECQ ug social distancing.