Lider, 3 ka mga sakop sa kulto, nakuhaan og mga armas

Lider ug iyang tulo ka mga sakop sa kulto gipangdakop human nakuhaag mga armas samtang naglibudsuroy niadtong Biyernes Santo sa gabii sa Brgy. Sangat, lungsod sa San Fernando.

Si Kelly Bernabe, 46, minyo, mekaniko, lider sa kultong Yeshua,uban sa iyang tulo ka mga sakop, nakuhaan og armas.

Iyang mga kuyog giilang sila si Santos Dela Cruz, 42, alyas Sonny, driver, taga Brgy. Valladolid, dakbayan sa Carcar; Ferdinand Domingo, 47, driver, taga Sangat, San Fernando; ug Jomar Calago 28, dunay kapuyo, taga Sangat.

Si Captain Efren Diaz, Jr., hepe sa San Fernando Police Station nga nahinabi sa Superbalita

Cebu, nibutyag nga dunay mga concerned citizen nga ningtawag kanila nga dunay upat ka mga tawo nga armado nga mga bungoton, tag-as kaayog mga buhok.

Nakuyawan sila kay nagpabuto sa ilang gidalang armas samtang naglibudsuroy.

Ilang naabtan si Domingo nga nagsalib-ay pa sa rifle air gun sa iyang abaga.

Dihang gipangayoan og lisensya, wa siyay napakita.

Sila si Bernabe ug laing duha ka mga miyembro girekisa sa kapulisan, nakuhaan sila og usa ka kalibre. 45 nga armas nga dunay mga bala ug duha ka mga .38 caliber revolver ug mga bala nga kabhang.

Wa sab silay mga dukomentong gipakita hinungdan nga gipangpusasan.

Si Diaz niingon nga sila si Bernabe ug mga kauban padulong sa ilang ritual sa pag-ampo sa ilang ginuo nga si Judas Escariote. Ang mga suspek way kulba nga maglakaw sa kagabhion sa national highway nga nagdala og armas.

Si Diaz nibutyag nga dihang gipangutana nganong wa sila mag-face mask nga gipatuman man ang enhanced community quarantine (ECQ) sa Probinsya sa Sugbo tungod sa coronavirus disease (Covid-19), sila nangatarungan nga di sila madutlan niini.

"Ana sila, Sir, wa man mi anang face mask kay dili makadulot namo ang mga sakit. Di sab makadulot namo ang Covid19. Gawas niini, dili sila madutlag bala ingon man sundang kay sila kublan," dugang ni Diaz.