Gipatapok man hinuon

Sukad pa sa miaging semana nagsugod ang pagpanghatag sa mga hinabang ngadto sa mga lumolupyong apektado sa enhanced community quarantine (ECQ). Apan hangtod karon daghan ang nangreklamo nga wa makadawat sa hinabang. Naa say ubang mga barangay nga nangreklamo ang mga lumolupyo kay gubot pa sa lukot ang paagi sa pagpanghatag.

Sakto unta kaayo ang pag-apod-apod sa mga hinabang nga ipanghatod ngadto sa tagsa ka mga balay. Mahimo kini sa matag barangay pinaagi sa pagsangon sa tahas ngadto sa tags aka tawo, pananglitan, sa mga konsehal ug sangguniang kabataan.

Mao usab ni ang maayong higayon nga masayran sa matag barangay ang gidaghanon sa mga lumolupyo, panimalay ug uban pa. Dinhi usab masukod ang katinud-anay ug kaligdong sa mga lider sa mga barangay.

Masuwayan usab ang ilang liderato, kon unsa sila kamaayo mopadagan ug modumala sa ilang tagsa ka teritoryo panahon sa mga katalagman, sama ning paghasi sa coronavirus disease (Covid-19).

Di magubot ang pagpang-apod-apod kon ang barangay kapitan ug iyang mga ginsakpan mosakripisyo sa pagpanghatod sa mga hinabang sa tagsa ka balay. Likayan ang pagpatapok kay bisan unsaon sa pagpugong sa mga tawo, labina niadtong gutom na ug nawagtangan og kapanginabuhian, maninguha kini sa paglinya bisan pa sa hulga sa Covid.

Ang pagpatapok kanila sa gym naghimo na hinuon sa katuyoan sa ECQ pass ug listahan sa mga lumolupyo nga way kapuslanan. Kay kinsa mang tawhana ang motuman pa sa social distancing kon magdasok na sa usa ka dapit? Maghuna-huna ka pa ba sa Covid kon ang imong pamilya hapit na magutmi kay w aka nay ikapakaon?

Makaguol kay duna gihapoy mga barangay nga nagpatapok sa ilang mga lumolupyo. Kini nagpasabot lang nga sa tinapulan nga paagi sa pagpanghatag. Gusto ang mga lider og mas sayon, apan sa ingon ilang gibutang ang ilang mga lumolupyo sa kakuyaw sa mananakod nga sakit.