Happy Easter
Tungod sa kabalaka sa coronavirus disease (Covid 19), daghang mga kalihukan sa Simbahang Katoliko sa Semana Santa ang nakanselar. Wala na mapahigayon og masaksihi ang mga naandang kalihukan sama sa Visita Iglesia niadtong Holy Thursday, Siete Palabras ug Holy Procession sa Biyernes Santo ingon man ang mga misa karong adlawa, Easter Sunday. Bisan ang mga mabulukon nga Sugat sama diha sa lungsod sa Minglanilla, kanselado usab.
Una nang nakanselar ang pagpahigayon og mga misa. Aduna man toud mga misa apan gipaagi na kini sa ‘live
streaming’ sa social media. Kini aron ma-obserbar ang social
distancing usa sa mga gihingusgan karon sa kagamhanan. Di lang ang taga simbahan ang way kita karon, apil usab ang mga patigayon nga nagsalig sa mga kalihukan sa simbahan nunot niining Semana Santa.
Bisan gani ako morag wala kaayo makabatyag sa kalihukan sa Semana Santa gumikan lagi kay nagmingaw ang mga simbahan. Tingbakasyon man unta karon. Ang mga tawo dinhi sa siyudad mangadto sa probensiya kay adto mamakasyon. Adto sa beach resorts ug kabukiran kay mangita og mabugnaw nga lugar gumikan sa kainit sa panahon. Ang mga adunay igong pundo, mangadto sa gawas aa nasud. Apan karon gumikan sa enhanced community quarantine o lockdown, hipos ang tanan. Apan unsa pa may angay ibakasyon sa katawhan nga dugay naman silang namakasyon? Tiaw ba nimo kanang magtulo na ka semana na ang lockdown nga diin naa ra sa balay ang tanang sakop sa pamilya. Kon dili lang siguro gumikan sa panginahanglan labi pa sa trabaho ug negosyo ug pagkaon, mas daghan siguro ang giganahan sa lockdown. Tulog, kaon, tan-aw og TV ug mga video ang trabaho. Daghang manambok ug mabuntis human sa lockdown.
Nakadalikyat ako sa probensiya niadtong Holy Thursday ug Good Friday. Ug tinuod nga nagmingaw ang kalungsuron. Misunod gyud ang tanan sa ECQ nga gi-imponer sa kagamhanan sa lalawigan sa Sugbo. Bisan ang mga tricycle ug mga habal-habal nga maoy naghatag og gubot sa dagan sa trapiko sa kalungsuran, wala na gyud managan. Inig human niining krisis, mobalik ra. Mag-ampo lang kita nga matapus na kining tanan. Happy Easter sa tanan.