Giligid nga bato
May nabasa ako sa FB diin gibatbat ang mga lakang nga gihimo sa pangagamhanan sa Dakbayan ug Lalawigan sa Sugbo, kansang mga lakang maoy rason kon nganong wala kuno mokuyanap ang Covid. Maayo sad baya nga makahibalo ang katawhan kon unsay ginahimo sa gobyerno. Naguol lang ko kay wa gyod ko kabasa sa pulong nga “puhon” o ang katugbang niini sa Ininglis. Daw nag-agad ang maong kahimtang sa buhat sa tawo lamang.
Ang unang nakasaksi sa walay sulod nga lubnganan mao si Maria Magdalena. Namatikdan niya nga giligid ang dakong bato nga maoy misira sa lubnganan. Sa iyang pagsabot may mikuha sa patayng lawas ni Jesus. Midagan siya ngadto kang Pedro ug sa tinun-an nga gimahal ni Jesus
ug misumbong kanila. Nagdinaganay ang duha padulong sa lubnganan. Nakauna og abot ang laing tinun-an apan wala siya mosulod. Gitugotan niya si Pedro nga mosulod ug diha pa lang siya misulod. “Nakita niya ug siya mituo,” sumala pa sa ebanghelyo.
Unsa may gihimo sa maong disipulo samtang naghulat siya sa baba sa lubnganan ug gipasulod usa si Pedro? Dili kadto hunong kay gikutasan tungod sa matulin nga dagan. Posible nga pangatahoran kadto kay maguwang man niya ug may dako nga katungdanan si Pedro sa Kristohanong katilingban.
Kon akoy pasultion, mihunong usa siya aron mamalandong. Nakigharong usa siya sa dili matugkad nga gasa sa kaluwasan, diha sa pagpanubos ni Jesucristo, pinaagi sa
Binasi sa Mga Buhat 10:34, 37-43; Salmo 118; Taga-Colosas 3:1-4; Juan 20:1-9 gasa sa pagtuo nga iyang nadawat. Mituo siya bisag wala pa niya masabti ang kahulogan sa pagkabanhaw nga kini gitagna sa mga propeta.
Gikinahanglan pa ang Pentecostes aron malambigit ang pagkabanhaw ni Jesus sa gitagna sa mga propeta. Mao kini ang unod sa mga wali ni Pedro human sa Pentecostes. “Naghisgot mahitungod kaniya ang tanang mga propeta, nga nag-ingon nga ang tanan nga nagtuo kaniya pasayloon sa ilang mga sala pinaagi sa gahom sa iyang ngalan,” nagkanayon si Pedro sa iyang wali.
Gidugangan sa sulat ngadto sa mga taga-Colosas ang pamalandong ni Pedro. May gahom ang pagkabanhaw sa pagdani sa tumutuo ug pagbag-o kaniya. “Sanglit gibanhaw na man kamo uban ni Ciristo, tinguhaa ang mga butang nga atoa sa langit diin naglingkod si Cristo sa iyang trono sa tuo sa Amahan.” Ang gibunyagan, nga miambit sa kamatayon ug pagkabanhaw ni Jesus, kinahanglan dili na yutan-on kon dili langitnon na ang panghunahuna ug kinaiya.
Apan mabag-o lamang kita kon naligid na pod ang mga bato sa atong panghunahuna ug kinaiya. Namalandong kini sa pulong sa Dios. Gilambigit nila ang pagkamatay ug pagkabanhaw ni Jesus sa Balaang Kasabutan.
Niining panahon sa Covid, kanunay kitang gipahinumdoman ni Pope Francis sa pag-amoma sa atong katilingbanong panumdoman kay kini motabang gyod nato. Daghan tag nakat-unan sa panahon sa Covid nga dili angay kalimtan inigbalik nato puhon sa mga naandan.
Naligid na ba ang atong mga bato?