Until the end of time

Dali kong mibangon dihang dunay incoming call sa akong selpon. Gikab-ot dayon nako ang akong selpon nga gipatong ko sa gamay nga lamesa sa may ulohan sa akong kama. Nalipay kaayo ko kay si Dondon ang mitawag.

“Hello, Sweet? Abi kog naunsa ka na. Karon ka pa man gud motawag. Di sab tika makontak kon tawgan tika.”

Mipahimutang kog sandig

sa headboard sa akong kama.

“Sus, nawala ang akong selpon kadyot, Sweet. Lobat pa gyud. Maayo gani kay nakit-an sa akong cousin nga diha ra sa ilawom sa iyang kama. Nakahigda man gud ko sa iyang kuwarto. Natagak diay akong selpon ug napunta sa ilawom sa kama.”

“Aw, unya, komusta ka na diha sa Manila?”

“Okey lang ko. Problema nako kay di ko basta-basta nga makapauli diha sa ato. Lockdown pa sa tibuok Luzon.”

“Pasagdi lang. Makalingkawas ra gihapon ta aning makalilisang nga kagaw sa Covid-19.”

Naabtan si Dondon sa Enhanced Community Quarentine didto sa Manila. Duna man gud siyay importanteng tuyo didto bahin sa iyang pag-transfer og eskuwela dinhi sa Cebu. Sa Manila siya nagsugod og tungha sa college pagkahuman namo sa hayiskol. Ang iyang iyaan nga dato nga nagpuyo sa Manila maoy naggasto niya. Apan nakasabot ra gihapon ang iyang iyaan nga gusto niya nga anhi gyud mopadayog eskuwela sa Cebu.

Ang iyang iyaan gihapon ang mogasto sa pagtungha ni Dondon. Parehas ming third year college na. Since sa among fourth year sa hayiskol, suod na kaayo mi. Hangtod nga sa among pag-graduate sa hayiskol, nagkarelasyon gyud mi.

Wa may problema namo ang among long distance relationship. Kanunay man ming dunay communication pinaagi sa selpon.

“Grabe pa man gihapon diha sa Luzon, Sweet. Wa pa man gihapon makontrol ang coronavirus disease.”

“Mao lagi, Sweet. Pero nakahibawo ko nga moabot ra gihapon ang panahon nga makalingkawas ang tibuok kalibotan aning maong kagaw. Dunay kaluoy ang Diyos.”

Sweet ang among tinawganay ni Dondon. “Amping diha, Teresa.” “Amping sab diha, Dondon.” Unya malipayon kong mibalik paghigda. (SUMPAYAN)