Kapait panahon sa Covid
Di ko maka imagine sa kinabuhi karon sa akong mga higala nga ang ginihawa puro biseklita. Kada weekend, labina kon Dominggo, gitaid pagtungas ang kabukiran sa Metro Cebu, apil na ang Balamban ug Toledo. Karon, wa na silay activities, bisan short ride lang.
Hinuon, daghan nila dunay trainers. But lahi ang actual kay sa trainer lang. Okay ra kon tinguwan o kaha bagyo, kay molanat ra og usa ka semana una pa makasikad. Apan kon usa ka buwan kapin nga di makasikad unya trainer lang ang kalingawan, lahi na, sobra pa sa laay ang kinabuhi. Maora tingalig gibuwagan og uyab, mag-alindasay, di makatug nga maghayang.
Ang mabasol ani kay ang coronavirus disease (Covid-19) nga nakatakod na og 25 sa Cebu City. Duna na gani nangamatay.
TUGTAN UNTA
Kon ako lay pabut-on, okay ra ang mag mountain biking tungas sa bukid o mag trail. Kay layo ra kahigayunan nga magtakod o dunay matakdan. Naa sab ang social distancing.
I-discourage lang ang mga group ride. Kon naa man gani, mga tulo lang ka buok ang tugtan nga magkakuyog. Ang pait lang kinahanglan ang face mask kay mandatory man. Kutas itungas, unsa na kaha kon mag face mask?
Pipila sa European nga mga nasod nagtugot sa ilang mga lumolupyo nga maka bike sa ilang pagbiyahe. Ngano man? Sa biseklita, naa diha ang klarong social distancing. Mas luwas ang pagbiyahe kay di ka man makasagol sa ubang mga tawo. Di ka mosud og mga lugar nga pampubliko. So, layo ang kahigayunan nga maadto kag dapit nga kontaminado.
Gawas niini, nakita usab sa mga sayantipiko nga maayo karong panahuna ibiseklita kay gawas nga minos ang mga sakyanan sa dan, ang pag-exercise makatabang sa pagkombate sa imong lawas batok sa mga kagaw kay mopalig-on sa immunity.
MAS KUYAW
Unya kon wa kay buhaton, bisan gamay lang nga pasingot ning panahon sa Covid, mas kuyaw na hinuon ang imong panglawas. Duna nay mga sakit nga motumaw kay nagsige na lang og yaka, mokaon og bisan, apil na ang unhealthy foods.
Ang exercise maoy higayon nga ang toxins sa lawas mapagawas. Ang mga tambok mahilis kay gigamit sa lawas nga energy sa lawas. Sagad sa mga tig exercise, labina kon magbantay sa diet, di tambok.
Mao na, samtang naa pay quarantine, di ta palabig kaon mga migo. Ayaw sa sigeg hubog hubog sa balay. Basin malipat ka, makasikad ka bisan naa pay quarantine. Masikwate na hinuon.