GASA SA GRASYA SA KINABUHI
Ang grasya sa kinabuhi gasa gikan sa kahitas-an. Mas tam-is ug makahuloganon kini kon imong ipaambit ngadto sa uban.
Alang ni Constantino “Babes” Lopez, ang pagsaulog sa adlaw nga natawhan usa sa mga pamaagi sa pagpasalamat sa
Ginuo sa laing tuig nga miabot sa iyang kinabuhi.
Mas makahuloganon ang thanksgiving kon kini saulogon uban sa iyang pamilya, mga kauban sa trabaho ug suod nga mga higala.
Niadtong Marso 11, 2020, giselebrar ni Babes ang ika-47 sa kasumaran sa iyang adlaw nga natawhan.
Usa ka yano nga birthday party ang gihimo sa ilang panimalay sa Barangay Don Andres Soriano (DAS) (Lutopan), dakbayan sa Toledo, kasadpang bahin sa Sugbo.
“Simple get together lang. Every year mag-celebrate ko as thanksgiving sa akong kinabuhi,” matod ni Babes.
Nagsugod ang salo-salo alas 4 sa hapon sa maong adlaw.
Si Padre Ponce Jed Billones, kura paroko sa Our Lady of Mt. Carmel Parish, diin sakop ang ilang barangay, ang nihimo sa blessing sa mga pagkaon.
Alang ni Babes ang paglabay sa laing tuig sa iyang kinabuhi maoy labing nindot nga gasa, uban sa maayong lawas ug kalinaw sa tibuok nasod.
“Importante laing tuig ang niabot sa gasa sa grasya sa akong kinabuhi,” dugang niini.
Miabot og pito ka mga cake ang nadawat nga gasa ni Babes gikan sa iyang mga higala.
Gihatagan usab siya og mga unlan sa ubang mga higala samtang stuffed toy gikan sa iyang hinigugma.
Usa ka bag-ong cellphone ang regalo ni Babes alang sa iyang kaugalingon atol sa iyang birthday.
Siya nangalagad isip konsehal sa Barangay DAS sud sa duha na ka termino o pito ka tuig.
Usa sa iyang birthday wishes nga mopatigbabaw ang kalinaw ug pagtinabangay sa mga Filipino sa tibuok nasod.
“Kon naa ang pagtinabangay, naa gyud nay pagsinabtanay,” dugang ni Babes.