Spence Jr. gusto dayon nga makig-away ni Pacquiao

Kon mobalik na sa normal ang sitwasyon ug masugpo na ang ang coronavirus disease (Covid-19), nagtinguha si world welterweight champion Errol Spence Jr. nga mosagubang dayon og dakong away sa iyang pagbalik og saka sa ring.

Gani, ang gusto dayong kontrahon ni Spence mao ang Filipino boxing icon Manny Pacquiao, kinsa maoy bugtong 8-division world champion sa kalibutan.

Si Spence, kinsa maoy tagiya sa World Boxing Council (WBC) ug International Boxing Federation (IBF) welterweight titles, taodtaod na sab nga wala nakaaway gumikan sa mga panghitabo sa iyang kinabuhi.

Apan bisan pa niini, wala'y plano si Spence nga mosagubang og usa ka tune-up bout.

Naaksidente si Spence ug diriyot nakabsan sa iyang kinabuhi human kini naaksidente sakay sa iyang awto nga Ferrari niadtong Oktubre sa miaging tuig.

Nagplano na unta nga mobalik og away si Spence human naalim gikan sa pagkaangol apan nalangan kini gumikan sa pagkuyanap sa Covid-19.

Gitino ni Spence nga ang iyang prayoridad nga kontrahon mao si Pacquiao, kinsa maoy naggunit sa welterweight title sa World Boxing Association (WBA).

Kon dili man gani si Pacquiao, gusto sab nga kontrahon ni Spence mao si World Boxing Organization (WBO) welterweight king Terrence Crawford.

Nagtuo si Spence nga mas dali ihan-ay ang panagharong nila ni Pacquiao gumikan kay pareho silang aduna kontrata sa Premier Boxing Champions ni Al Haymon.

"I didn't think he was going to look that good - I didn't think he was going to look like that. I would love to fight Pacquiao, he's a future legend, he's a Hall of Famer, he's a guy I would love to fight. He has a belt, too, I would love to get that belt." asoy ni Spence nga napatik sa www.boxingscene.com.

Kon madayon ang ilang away n Pacquiao, tinguha ni Spence nga ipahigayon kini sa AT&T Stadium sa Dallas.

"Me and Pacquiao would probably do 100,000 if we fought at AT&T Stadium [in Dallas]," dugang ni Spence. "I think Pacquiao would be the perfect opponent."