PALARO IPAKANSELAR
Gikan sa pagkauswag, gituohang moabot sa punto nga hingpit nang kanselahon ang 2020 Palarang Pambansa gumikan sa padayong hulga sa coronavirus disease (Covid-19).
Mismong ang Department of Education (DepEd) mao na ang misugyot nga kanselahon ang labing dakong kompetisyon sa paugnat sa kusog sa nasod.
Nagsilbe kining usa ka lakang aron malikayan nga mas mokatap pa ang Covid-19 nga nakatakod na og kapin sa 4,000 ka mga tawo sa tibuok Pilipinas.
Sa interbyu sa GMA News Online, si DepEd Undersecretary Annalyn Sevilla niingon nga nagkinahanglan pang maaprubahan sa Palarong Pambansa board ang ilang sugyot.
Naglangkob sa board mao ang DepED officials, Philippine Sports Commission chairman ug Interior Secretary.
Usa sa mga natakdan sa Covid-19 mao si DepEd Secretary Leonor Briones nga nakompirmar niadto lang Huwebes, Abril 9, 2020.
Katapusang nakanselar ang Palarang Pambansa niadto pang 2001 gumikan sa kakuwang sa pundo.
Ang desisyon nga ipakanselar ang kompetisyon nakakuha og suporta gikan sa mga Sugboanon.
Alang kang track and field
coach Arvin Loberanis nga ang pagkanselar sa kompetisyon maoy labing sakto nga desisyon gumikan kay prayoridad ang kaluwasan sa mga tawo.
Gipasabot ni Loberanis nga talagsa ra nga mahitabo kining maong pandemic ug angayan kining tutokan og insakto samtang ang Palarong Pambansa matag tuig ipahigayon.
Nidugang si Loberanis nga kaayuhan kini sa tanan hilabi na sa student-athletes.
Giangkon ni Palarong Pambansa gold medalist Martchan Torregosa nga nagmagul-anon ning maong hitabo apan nakasabot siya sa sitwasyon.
Mao na unta kini ang katapusang tuig nga mosalmot si Torregosa sa kompetisyon.
Nanghinaot siya nga kon mahibalik na sa normal ang sitwasyon, hayan tugtan siya nga makasalmot pa sa kompetisyon sa katapusang higayon.