‘TOTAL LOCKDOWN’ SA SITYO ZAPATERA SA BARANGAY LUZ
3 POSITIBO SA COVID-19
Gi-lockdown sa mga opisyal sa Barangay Luz, Dakbayan sa Sugbo sugod niadtong Martes, Abril 7, 2020, ang usa ka sityo diin nagpuyo ang tulo ka mga positibo sa coronavirus disease 2019 (Covid-19).
Si Barangay Captain Ronilio Sab-a nitug-an nga ila dayon nga gi-lockdown ang sityo Zapatera niadtong Sabado human sila mahibawo gikan sa Department of Health (DOH) 7 nga sa mao nga sityo nagagikan ang tulo ka mga positibo sa Covid.
Nasagmuyo lang siya kay gahi og ulo ang mga lumolupyo.
Tungod niini, ila dayon nga gi-lockdown ang sityo pinaagi sa pagbutang og exit ug
entrance ug gipabantayan og mga pulis.
Sukad sa lockdown, wa na silay gipagawas ug gipasulod sa sityo.
“Total lockdown na sila. Naay mga pulis nag-guard, city health mo-monitor. Ang amo lang gyud, shameful kaayo kay ang mga tawo gahi kaayo’g ulo, ilabi na kana sitio-a. Nya mao nay pinakadaku namo nga sitio. In fact population diha niabot gyud og 10,000 ka individuals. Sige mi pahimangno, grabe na among pakiluoy. Please stayat-home,
mao na atong way para dili na mo-extend pa,” saysay ni Sab-a.
Dugang ni Sab-a nga nakahatag pa sila og mga pagkaon sa mga residente, apan iyang giangkon nga kon molanat pa og dugay, sila maglisod na pagpakaon.
Si Cebu City Mayor Edgardo Labella, human mahibawo, nipadala usab og dugang mga pagkaon sa mga lumolupyo.
WA GIPA-OSPITAL
Si Sab-a niingon nga sukwahi sa mga taho, ang usa ra sa tulo ka mga positibo ang naospital. Ang duha nag-home quarantine hinungdan nga nabalaka sila og maayo karon.
Ang unang positibo mao ray naospital samtang ang ikaduha ug ikatulo puro asymptomatic.
Ilang gihangyo si Labella ug DOH nga ibalhin og laing dapit ang tulo ka mga pamilya nga nagpositibo.
Ang mga balay sa sityo Zapatera sikit kaayo, ang mga pultahan ingon sa nag-abot ra, hinungdan sa tumang kakuyaw sa pagpanakod.
Si Cebu City Councilor Dave Tumulak ni-contact dayon sa Department of Education (DepEd) aron magamit ang Barangay Luz Elementary School o ang national high school.
Ang DepEd niuyon nga ang edipisyo sa national high
school maoy balhinan kay
medyo maoy suok ug isolated.
Si Barangay Konsehal Maynard Salinguhay niingon nga kon di mohimo og lig-ong lakang ang kagamhanan, dakong risgo ang pagpanakod samtang gi-home quarantine ang duha nga asymptomatic.
“Ang among struggle karon as per protocol sa DOH, if asymptomatic ang nag-positive, home quarantine ang
advice. Pero knowing the situation sa area, ang mga balay dug-ol kaayo. Ang sitwasyon sa balay sa usa ka nag-positive gamay ba, nya daghan sila namuyo. So, dili ta ka-sure nga dili ma-further contaminate. Mao kami sa council mohangyo gyud mi sa tabang sa City government, sa DOH nga sabton nila among recommendation nga i-isolate,” pagpasabot ni Salinguhay.
PAGPANAKOD
Ang unang nasakit mao ang 68 anyos nga lalake nga duna nay gipamati nang daan nga mga sakit.
Nasuta siyang positibo sa Covid-19 niadtong Abril 7.
Sa ilang contact tracing, ang iyang 67-anyos nga kapuyo nagpositibo usab sa Covid-19.
Ang 59-anyos nga driver sa pampublikong sakyanan nga suod nga higala sa 68-anyos positibo usab sa Covid-19. Ang tulo puro mga way
travel history hinungdan nga nagduda sila si Sab-a nga local kini nga transmission.
Gusto nila ni Sab-a nga ang pamilya sa tulo mabalhin sa tunghaan.
Ilang nabalak-an ang pamilya sa driver kay 13 silang nagpuyo sud lang sa usa ka balay, nga naglakip sa mga bata.
Ang siyudad sa Sugbo dunay 25 na ka mga kaso sa Covid-19, 14 kanila negatibo na sa mga test.
Samtang, si Labella nagkanayon nga magpabilin una sa home quarantine ang duha nga nagpositibo subay sa protocol nga gipatuman sa DOH.
Ang mayor nitahas kang Dr. Daisy Villa, city health officer, sa pagpa-monitor matag karon ug unya sa duha ka pasyente aron masusi ang kahimtang sa ilang panglawas ug kon aduna nay makita nga sintomas sa Covid-19, ipa-admit dayon kini sa tambalanan.
Samtang si Tumulak, chairman sa Local Disaster Risk Reduction and Management Council, nagkanayon nga posible ibalhin sa Bayanihan Center nga nahimutang sa karaang Sacred Heart School ang duha ka pasyente karong adlaw nga Huwebes.
Si Labella nitug-an nga abagahon sa siyudad ang pagkaon sa pamilya sa mga nagpositibo samtang nag-atubang sila sa krisis.
Ang mayor nidugang usab nga kon maglisod na sa pagkaon ang kapin 9,000 ka individual, padad-an kini niya sa Mobile Market ug tugotan nga makapalit ang usa ka sakop sa pamilya para adunay makaon ang dul-an 800 ka pamilya.
Karong Abril 15, moabli na usab ang quarantine facility sa dakbayan sa Sugbo nga nahimutang sa North Reclamation Area. /