OCD GITAHASAN SA CONTACT TRACING SA COVID-19 CASES

Ipublikar na unya ang ilhanan sa magpositibo sa Coronavirus disease 2019 (Covid-19) subay sa bag-ong resolution nga nasabutan sa Inter-Agency Task Force (IATF) on Emerging Infectious Disease nga himuon kini aron mas mapadali ug palig-unon pa ang contact tracing efforts sa gobyerno.

Samtang ang Office of the Civil Defense (OCD) na usab ang gitahasan nga mohimo sa contact tracing itandi kaniadto nga ang Department of Health ang nihimo niini.

Matod ni Cabinet Secretary Karlo Nograles atol sa iyahang press briefing sa Easter Sunday, Abril 12, nga nasabutan sa IATF ubos sa Resolution 22 nga gipirmahan niadtong Abril nga mandatory na nga ipahibawo sa publiko ang ilhanan sa mga magpositibo sa Covid-19.

“The IATF adopts the policy of mandatory public disclosure of personal information relating to positive Covid-19 cases to enhance the contact tracing efforts of the government,” si Nograles nagkanayon.

Dugang niini nga ang OCD mao ang bag-ong gitahasan nga mohimo sa contact tracing, “The Office of the Civil Defense in coordination with other agencies and local government units as may be appropriate shall here after lead the contact tracing efforts of the government.”

Subay niining bag-ong lakang kinahanglan nga aduna’y “Data Sharing Agreement” ang DOH ug OCD nga nahisubay gihapon sa Republic Act. 10173 o ang Data Privacy Act.

“For this purpose, the DOH, the OCD are directed to enter into a “Data Sharing Agreement” in accordance with Republic Act No. 10173 or the Data Privacy Act,” matod ni Nograles.

Wala hinuon giklaro ni Nograles kon unsa nga ahensiya ang mopublikar sa ilhanan niining mga magpositibo ug kon unsa ang pamaagi niini.

Si DOH 7 regional director Dr. Jaime Bernadas wala pa hingpit makadawat og komunikasyon kabahin sa bag-ong mando.

Matod niya, makaligis “kaayo” kini sa Data Privacy Act kon i-diretso pagpublikar ang ilhanan sa mga magpositibo nga wala’y consent sa pasyente.

Apan klarohon pa ni Bernadas ang maong bag-ong kalamboan tungod kay wala paman siya mahibawo niini.

Uwahi niyang nahibaw-an nga ang OCD mao ang mo-contact trace apan kinahanglan ang consent sa pasyente kon i-publikar kini diin niadto pang Marso 27 kini nga anunsiyo ni Nograles.

Ang OCD 7 sa ilang bahin, andam sa maong tahas ug mibutyag nga aduna sila’y igo nga personnel nga mohimo sa contact tracing tungod kay daghan silag miyembro sa ilahang Regional Disaster Risk Reduction Management Council.

“We will use the term whole of the instrumentalities/ stakeholders approach kay may kanya-kanya man nga forté ang mga agencies,” matod ni OCD 7 assistant regional director Engr. Ver Neil Balaba.

Hinuon naghuwat pa sila sa guidelines niini gikan sa ilahang ulohang buhatan.