‘Baby boom’ human sa Covid-19?
Dunay pasiaw sa social media bahin sa usa ka asawa nga nihangyo nga ilibkas na intawon ang enhanced community quarantine (ECQ) nunot sa coronavirus disease 2019 (Covid-19) kay nanghapdos na ang iyang bugan sa pagsigig dulog sa iyang bana.
Ubos man gud sa ECQ, gidili ang wa kinahanglana nga paggawas sa balay. Mao na nga ang mga magtiayon naa ra pirmi sa balay. Unsay buhaton sa magtiayon? Sa abli pa ang malls, kon magdulog ang magtiayon unya moingon ang asawa, “Darling, wa na koy panty” tubagon man lang sa bana, “Tulog na lang darling kay palitan ta ka ugma.”
Usa ka magbabalaod nabalaka nga moresulta kini sa usa ka “baby boom” siyam ka buwan gikan karon. Karon mao ang panahon sa ginaingon nga “planting rice.”
○ ○ ○
Duna nay ngan nga giandam alang sa henerasyon sa kabataan nga mahimugso liwas sa paghugpa sa makamatay nga coronavirus. Pagatawgon unya sila nga mga “coronials,” pulong nga gimugna gikan ra sab sa coronavirus. Si Kongresista Edcel Lagman sa Albay nabalaka nga ang ECQ moresulta sa “unplanned and unwanted pregnancies,” mga pagsabak nga wa planoha ug kontra gusto kay nahinaykan lang.
Gusto niya nga manghatag na karon ang gobyerno og contraceptives sama sa condoms aron malikayan kini. Yuna pa, di kaha mas maayo nga seguruhon nga pagkaon maoy unang ipanghatag sa mga tawong way trabaho ug gipanggutom inay condom?
○ ○ ○
Apan mosangpot gyud kaha ang ECQ sa Covid-19 sa usa ka baby boom? Sumala pa sa taho sa inquirer.net, adunay pagtuon bahin niini nga giulohan, “Will the Coronavirus Spike Births?”
Sumala pa sa maong pagtuon, ang grabeng gutom, mga linog, sobrang kainit sa panahon ug mga sakit moresulta sa pagkunhod sa mga bata nga mahimugso sa paglabay niini. Kanang sigig brownout maoy makapadaghan sa anak. Sa akong tan-aw ra ba ang Covid-19 mora sab og brownout kay di pagawson ang mga tawo sa balay ug way malls nga kadaganan.
Gani, makapahimuot ang lagda nga bisan asawa di na makaangkas sa motorsiklo nga gimaneho sa iyang bana. Unya inig ka gabii, magdulog ra silang duha.