Privacy o general welfare?

Adunay lakang sa pagkakaron ang Inter-Agency Task Force on the Management of Emerging Infectious Disease (IATF) nga ila nang i-publikar ang mga pangalan sa nagpositibo sa coronavirus disease (Covid-19). Kini aron madali ang contact tracing sa mga tawo nga na-exposed sa nagpositibo. Ang contact tracing maoy usa ka pamaagi nga mapugngan ang pagkuyanap sa virus kay mailhan man dayon ug madali ang pagpa-quarantine sa maong mga tawo.

Apan gikinahanglan nga timbang-tinbangon una nila kini gumikan kay ang maong lakang nasupak sa balaod. Ang Republic Act No. 10173 nga na-ilhan nga Data Privacy Act, naghatag og proteksiyon sa usa ka tawo batok sa tanang matang sa inpormasyon sa iyang pribadong kinabuhi nga mapublikar. Mao nga ang mga doktor dili basta-basta makapagawas sa impormasyon ngadto sa publiko kabahin sa sakit o kondisyon sa panglawas sa ilang mga pasyente. Gawas lang kon adunay pagtugot sa pasyente.

Apan kinsa man ang mopatigbaw? Ang katungod o privacy sa usa ka tawo o ang kahimtang sa kadaghanan? Ang privacy mao ang kagawasan gikan sa unwarranted intrusion sa mga pribadong kinabuhi. Unsa bay ipasabut sa ‘unwarranted’?

Matag higayon nga rekisahon kita inig sulod sa mall. O kaha kon pahuboon kita sa atong sapatos sa airport. Di ba kini pagpanghilabot man sa pribado natong kinabuhi?

Apan misugot og mi-uyon kita kay nasayod man kita nga mas labawng importante ang kaayohan sa labing daghan. Sa pagka-karon nagsugod na kita sa pagpugong sa atong katungod sa pagsuroy-suroy o kaha pagpaduol sa ubang mga tawo. Nawad-an na kita sa atong katungod sa pagbiyahe ngadto sa mga lugar nga atong gusto. Ato kining gihimo alang sa kaayohan sa kadaghanan ug dili sa ato lang nga kaayohan.

Unsay katarungan nga dili nato i-obligar ang atong kaugalingon sa pagtabang pinaagi sa pagbutyag sa inpormasyon kabahin sa makatakod nga sakit sa usa ka tawo?