Gawas sa iyang pagtabang, Pacquiao nag-ensayo sab
Taliwala sa iyang pangidaron, sa daghan niyang gimbuhaton ug ning kasamtangang sitwasyon sa kalibutan, wala'y nakitang senyales nga paingon na sa ubos ang boxing career ni Filipino legend Manny Pacquiao.
Sa usa ka video nga naka-post sa www.fighthype.com, gipakita sa bugtong 8-division world champion nga padayon siyang nagpakondisyon taliwala sa hulga sa makalilisang nga coronavirus disease (Covid-19).
Sa video, makita nga naa gihapon ang kaabtik sa Pambansa ng Kamao ng Pilipinas, naa gihapon ang iyang footwork ug ka kusog sa kumo.
Sa gipakita ni Pacquiao sa video, dili mailhan nga nagedad na siya og 41 ug nagdikit na sa pulong nga retiro.
Human sa iyang unanimous decision nga kapildihan batok kang American Floyd Mayweather Jr. niadtong 2015, aduna na'y mga nag-ingon nga angayan nang moretiro si Pacquiao.
Apan gipasabot ni Pacquiao nga nakasinati lang siya og angol sa iyang tuong abaga niadtong higayuna hinungdan sa iyang kapildihan.
Tuod man, nakabawi si Pacquiao pinaagi sa pagrehistro og 5-1 nga rekord human sa iyang kapildihan ni Mayweather nga nagsaka sa iyang kinatibuk-ang rekord ngadto sa 62-7-2, 39KOs.
Sa katapusang niyang away niadtong Hulyo sa miaging tuig, impresibo ang gipakita ni Pacquiao sa iyang paglupig kang Keith Thurman pinaagi sa desisyon sa ilang World Boxing Association (WBA) welterweight title fight. Gitataw ni Pacquiao nga ang iyang sekreto kon nganong taas ang iyang lahutay mao ang iyang training.
"For me, if I'm thinking about boxing, it's about how you prepare for the fight," batbat ni Pacquiao nga napatik sa www. philboxing.com. "I don't consider myself as the best boxer - or (to have) the best style in boxing. But I work hard. I punish myself during training. If my fight is 12 rounds - ask my coaches - I do every day 20 or 30 rounds. Before when I was young, 36 rounds every day - and the fight is only 12 rounds, so it's easy."
Nagplano unta si Pacquiao nga moaway og balik karong Hulyo, 2020 apan gituohang mauswag kini gumikan sa Covid-19.