NIETES GUSTO PA NGA MOAWAY
Giangkon ni four-division world champion Donnie "Ahas" Nietes nga duol na kaniya ang pultahan sa pagretiro apan iyang giklaro nga wala pa mahuman ang iyang misyon isip usa ka boksidor.
Gipasabot sa lumad nga taga Murcia, Negros Occidental nga ning panahon sa Enhanced Community Quarantine (ECQ), nasulod na sab sa iyang hunahuna ang pagretiro.
Apan wala pa siya mawad-i sa paglaom nga moabot ang oportunidad nga mahatagan siya'g kahigayunan sa pagkompleto sa iyang misyon.
Bisan sa kataas na sa iyang naabot, daw haw-ang gihapon ang pamati ni Nietes kon dili niya masagubang ang gipangandoy niyang away sukad pa ka niadto.
Si Nietes, kinsa napatik sa kasaysayan isip longest Filipino world champion diin naggunit siya og world title sulod sa 11 ka mga tuig, aduna pa'y tulo ka dagkong mga pangalan sa iyang timbang nga gusto pang kontrahon.
Gipangtumbok mao sila si World Boxing Council (WBC) super flyweight champion Mexican Juan Francisco Estrada (40-3, 27KOs), WBC No. 1 super flyweight contender Tha Sir Sir Rungvisai (47-5-1, 41KOs) ug World Boxing Association (WBA) super flyweight king Nicaraguan Chocolatito Gonzalez (49-2, 41KOs).
"Bisan kinsa ana nila gusto nakong kontrahon sa dili pa unta ko moretiro," matod sa 37 anyos nga ALA fighter sa pagpakighinabi ning mantalaan sa Facebook messenger.
Taodaod na sab nga wala nakaaway si Nietes human niya gibuhian ang iyang World Boxing Organization (WBO) super flyweight title sa miaging tuig.
Katapusan siyang miaway niadto pang Disyembre 31, 2018 diin midaog siya pinaagi sa split decision batok sa usa sa labing kuyaw nga boksidor sa Japan nga si Kazuto Ioka.
Human ning awaya, adunay obligasyon si Nietes nga modepensa sa iyang korona batok sa No. 1 contender nga usa sab ka Pinoy nga si Aston Palicte alang unta sa usa ka rematch.
Ang premiro nilang away ni Palicte niadtong Septiyembre 8, 2018 miresulta sa split draw.
Alang kang Nietes, wala na'y arang kaniya ang makig-away og balik kang Palicte hilabi na kay usa ra sab kini ka Pinoy.
Gusto ni Nietes nga makigbatok sa mas dagkong mga pangalan aron matuman ang iyang pangandoy nga away.
Kini maoy hinungdan nga mas gipalabi ni Nietes nga buhian na lang ang iyang WBO title.
Gitino ni Nietes nga dili siya hangtod sa kahangturan nga maghuwat sa iyang gipangandoy nga away.
"Seguro kon dili ko makakuha og dakong opportunity karong tuiga, basin mo-retire na lang ko," batbat ni Nietes.
Giangkon ni Nietes nga midako siya sa kasamtangan, hinuon wala siya nagpasagad sa kaugalingon ug nagbiseklita aron ipabiling kondisyon ang iyang lawas.
"Seguro mga 135 pounds ko karon. Okey ra na siya, makuha ra nako ang akong fighting weight (115) kon naa may offer nga moabot," dugang ni Nietes, kinsa nagpuyo sa Canduman, Mandaue City.
"Pero kon wala man gyud offer, mag-concentrate na lang ko sa akong gamay nga business," asoy ni Nietes.
Si Nietes adunay usa ka dump truck nga mohakot og mga bas nga gamiton sa konstruksyon. Aduna sab siya'y gipadagan nga travel and tours nga negusyo. Ning panahuna, matod ni Nietes nga gigamit sab niya ang iyang bakanteng mga oras sa pagtabang sa frontliners sa padayon pagpakigbatok sa makalilisang nga coronavirus disease (Covid-19).
"Maghatagan ko og snacks sa atong frontliners. Maayo na lang nga makatabang ta bisan ginagmay lang," dugang ni Nietes.